Wanïqa imëka llakikïkunatam apamun

Wanïpaq parlëqa alläpa llakikïpaqmi, tsëmi nunakunaqa wanïpaq parlayanllatsu. Tsënö kaptimpis llapantsikmanmi chämun.

Teytantsikkuna, majantsikkuna y wamrantsikkuna wanukunampaqqa mana mëqantsikpis listutsu këkantsik. Höraqa illaqpitam o ichikllapa ichikllapam chäramunman. Peru imanö kaptimpis, manam mëqantsikpis libritsu këkantsik y alläpa llakikïtam apamun.

Antoniupa teytanqa juk accidentichömi wanukurqan. Pëmi kënö nir willakun: “Pipis wayikita wichqarkur llävita apakoqnömi. Manam ni imëpis yëkïta puëdinkinatsu. Juntu rurayanqëkillatanam yarpärinki. Mana creita munarnimpis manam ima rurëta puëdintsiktsu. Tsëpita patsëqa kawëniki jukläyanam tikrarin”.

Anglicana iglesiapita y domingukunapa juk escuëlachö yachatsikoq Dorothy jutiyoq warmipam, 47 watayoq këkaptin qowan wanukïkurqan. Pëqa wanïllawan llapampis mana ushakärinqantam pensaq, peru manam segürutsu karqan. Tsëmi pastorninta ¿imataq wanurishqa pasamantsik? nir tapurqan. Pastorninnam kënö nir contestarqan: “Tsëtaqa pipis manam musyantsu y musyanapaqqa wanïtaran shuyänantsik”.

¿Rasumpaku shuyänantsikraq precisan? ¿O imanöllapis musyëta puëdintsikku wanurishqa ima pasamanqantsikta?