Niyanqankunapita wakinllam cumplikan, peru mëtsikam cumplikantsu

¿Musyëta munankiku shamoq tiempuchö ima pasakunampaq kaqta? Mëtsikaqmi musyëta munayan. Tsëmi atskaq nunakuna ima pasakunampaq kaqta musyatsikïta procurayan. Tantiyarinapaq.

• CIENTÏFICUKUNAQA mëtsika qellëtam gastayashqa y mas alli kaq mäquinakunatam utilisäyashqa, Patsata rakchatäyanqanrëkur ima pasakunampaq kaqta, warë junaq tiempu imanö kanampaq kaqta y maskunata musyëta procurarnin.

• IMANÖ KANAMPAQ KAQTA MUSYAQ NUNAKUNAQA polïticachö y qellë asuntuchö ima pasakunampaq kaqta musyatsikïtam procurayan. Warren Buffett nunatam Oräculo nir reqiyan, tsënöqa niyan ima negociukuna alli yarqunampaq kaqta, puntallapitana willakuptinmi. Jina Nate Silvermi, pasaq watakunachö pasanqankunata utilisan imakuna pasakunampaq kaqta musyatsikunampaq. Tantiyarinapaq, votacionchö mëqan polïticu gananampaq kaqta y maskunapaqpis.

• UNË DOCUMENTUKUNAPITAQA WAKIN KAQTAQA shamoq tiempupaq willakunqantam creitsikuyashqa. Tantiyarinapaq, mëtsikaqmi creiyan Michel de Notredame (Nostradamus) nuna 1500 watakuna witsan, mana entiendipaq qellqanqankuna, kanan witsan cumplikëkanqanta. 2012 wata 21 de diciembri killam, mäyakunapa calendariun usharqan, tsëmi mëtsikaq nunakuna pensayarqan tsë junaq Patsa ushakänampaq kaqta.

• ATSKAQ PUSHAKOQ RELIGIÖSUKUNAQA nunakuna pëkunaman creiyänanrëkurmi, entëru patsachö desgraciakuna pasakunampaq kaqta puntallapitana willakuyashqa. Harold Campingmi qateqninkunawan 2011 wata Patsa ushakänampaq kaqta entëruchö willakuyarqan, peru pantayarqanmi.

• PSÏQUICOS NISHQANKUNAQA ima pasakunampaq kaqta musyatsikur, wakimpitapis mas yachaq kayanqantam niyan. Edgar Cayce nunawan Jeane Dixon warmim, 1900 watakuna witsan ima pasakunampaq kaqta musyatsikuyanqampitaqa wakinllam cumplikarqan, peru atskachömi pantayarqan. Tantiyarinapaq, Jeane Dixonmi willakurqan Kima Kaq Jatun Guërra 1958 wata qallanampaq kaqta, y Edgar Caycemi nirqan 1960 watakuna pullan ëwëkaptin jatun lamarchö Nueva York marka hundikänampaq kaqta.

¿Imanöllapapis musyashwantsuraq ima pasakunampaq kaqta? Alläpam precisan kë tapukïta rurakunantsik. Ima pasakunampaq kaqta musyarqa, jukläyanachi kawakushwan ¿aw?