Nunakuna musyëta munayanqan tapukï

KAWËPAQ y wanïpaqqa tukïtam niyan. Wakinqa niyan wanurirnin juk läduchö kawar sïguiyanqantam. Wakinqa niyan, juk läduchö yuririr yapë kawayanqantam. Y wakinnam wanïllawan llapan ushakärinqanta niyan.

Itsa qamqa wamrapita yachatsiyäshunqëkillata o täranqëkichö creiyanqanllata creinki. Tsënö tukïta creikäyaptinqa, ¿musyëta puëdishwantsuraq wanurishqa ima pasamanqantsikta?

Unëpitam religionkunata pushaqkunaqa, alma mana wanunqanta yachatsikuyashqa. Catölicu, induismu, judaismu y islam religionkunaqa mana wanoq almayoq kanqantsiktam niyan. Jinamampis, wanurishqaqa espïritukuna kawayanqan sitiuchö almantsik kawar sïguinqantam yachatsikuyan. Büda nishqan diosman creeqkunaqa, wanurirnin sufrimientukunapita librakärir kushishqa kawakunapaq kaqtam creiyan. Y tsënö kawëtam pëkunaqa “nirväna” nishpa qayayan.

Kë llapan yachatsikïkunam nunakunata creitsishqa, wanurirqa juk läduchö kawanqantsikta. Mëtsikaq nunakunam niyan llapantsikpis wanoqlla kanqantsikta, y wanïqa Diosnintsikpa voluntänin kanqanta. Peru ¿imatataq Bibliaqa yachatsikun? Qateqnin kaq yachatsikïchömi tsëpita masllata yachakurinki, y Biblia yachatsikunqanta musyarirqa itsa espantakunki.