¿Pitaq Dios?

Mëtsika nunakunam Diosman creiyanqanta niyan, peru Dios pï kanqanta tapuriyaptinqa, manam llapantsu igual-lla contestayan. Wakinqa, Diosqa mana ankupäkoq kanqanta y jutsankunarëkur nunakunata castiguëta munanqantam niyan. Wakinnam, imëka mana allikunata rurakuyaptimpis, Diosqa alläpa kuyakoq karnin perdonanampaq kaqta pensayan. Y wakinnam, mana kuyakoq kanqanta y nunakunaman mana yarpachakunqanta niyan. Diospaq imëkata niyaptimpis, mëtsikaq nunakunaqa pensayan Diosta reqita mana puëdiyänampaq kaqtam.

¿Precisanku Diosta reqinantsik? Awmi. Porqui Diosta mas alli reqirninqa, mas kushishqam kawakunki (Hëchus 17:26-28). Pëman mas witiptikiqa, pëqa masmi kuyashunki y yanapashunki (Santiägu 4:8). Jina Diosta mas alli reqinqantsikqa, imëyaqpis kawakïta puëdinapaqmi yanapamäshun (Juan 17:3).

¿Imanötaq Diostaqa reqishwan? Juk alli amïguïkiman pensari. ¿Imanötaq mas alli amïgu këman chäyarqëki? Puntataqa jutintaraqchi musyarqëki, tsëpitanachi imanö nuna kanqanta, imata gustanqanta, imata melananqanta, imata ruranqanta y imata rurëta pensanqanta. Tsëkunata musyarmi, tsë amïguïkita mas kuyarqëki.

Jina tsë cuentallam, Diostapis mas reqita puëdinki kë tapukïkunapita yachakurnin:

¿IMATAQ DIOSPA JUTIN?
¿IMANÖTAQ DIOSQA?
¿IMATATAQ DIOSQA RURASHQA?
¿IMATATAQ DIOSQA RURANQA?
¿IMANÖTAQ YANAPAMANTSIK DIOSTA REQINQANTSIK?

Kë revistam, Bibliapa yanapakïninwan tsë tapukïkunata contestan. Qateqnin kaq yachatsikïkunaqa, Dios pï kanqanta musyanëkipaq y amïgun kanqëki imanö yanapashunëkipaq kaqtam rikätsishunki.