Reino ruramunampita llapanta musyatsishun
1 Kë mana alli tiempokunachöqa, atskaq nunakunam alli kawëtaqa shuyäyannatsu (Efe. 2:12). Wakinkunanam markäkuyan kayäponqankunaman, gobiernokunaman y cientïficokuna rurayanqanman, alli kawëta mana apëkäyämuptimpis. Noqantsikpaqa kapamantsikmi ‘anclanö almantsikta alli sinchipa tsarämaqnintsik’. ¡Tsëmi kushikïpaqqa! (Heb. 6:19.)
2 Diospa Reinonmi kë Patsata shumaqman tikratsenqa. Wanushqakunapis kawariyämonqam (Hech. 24:15). Waktsa kë, mana alli rurë, qeshyë, tsatsayë, y wanïpis ushakanqanam (Sal. 9:18; Mat. 12:20, 21; Apo. 21:3, 4). Ichikllanam pishin Diosnintsik änikonqankuna cumplikänampaq. ¿Mëqan cumplikänantataq alläpa munanki?
3 Alli noticiakunaqa willakunapaqmi: Diospa Reinon ruramunanta musyëkarqä, ¿imanöraq upällaqa kakushwan? Diosnintsikta y nuna mayintsikta kuyëmi yanapamantsik Jesusnö ‘waktsakunata alli willakïta willapänapaq, [...] preso cuenta këkaqkunata willapänapaq, wiskunö këkaqkunata rikätsinapaq [y] llakikushqakunata yanapanapaq’ (Luc. 4:18). Apóstol Pabloqa willapäkorqanmi rantikuyanqancho y mëcho tsëchöpis; “alläpa ocupadom karqan” willapäkurnin (Hech. 18:5). Alli ruranqanta qatishqaqa, manam “kë mundopa yarparënin y ushakaqlla kaponqankunaman markäkïnin”, ushakätsenqatsu shumaq kawakï shuyaranqantsikta (Mar. 4:19).
4 Piñakoqkunata y Reinopita wiyakïta mana munaqkunata o chikikoqkunata tarishqapis, Diospa gobiernonman confiakonqantsikqa manam ushakanqatsu, “musyantsikmi Diosnintsik llapan änimanqantsikta cumplinampaq kaqta, y ama kakushuntsu rasumpatsuraq o manatsuraq nishpa”, y manam “penqakuntsiktsu alli noticiapita willapäkïta” (Heb. 10:23; Rom. 1:16). Mana penqakushqa y alleq tsarakushqaqa, itsa pipis wiyaramashwan.
5 Biblia nenqankuna kanan witsancho cumplikanqampaq parlarpis, yarpë, willapäkorqa purintsik manam ushakäyankim nirllatsu. Tsëpa rantenqa Diospa Reinon altsamunampaqmi willapäkuntsik, awmi, Diospa Reinompitam alli noticiata willakïkantsik. Tsëmi alli noticiapita alleq willapäkushun, y kushishqa ‘shuyëkanqantsikman alleq markäkushun ushakë chämonqanyaq’ (Heb. 6:11).