Willapäkurmi fënintsik kanqanta rikätsikuntsik
1. ¿Imakuna pasakunampaqraq willakorqan Jesus?
1 Apostolkunaqa alleqmi yachakushqa kayarqan Maestron ciëlochö gobernar qallananta y ushakë tiempopaq willakïkunata. Nunakunaqa alläpa llakikïwanmi hipayanman karqan: guerrakunawan, mallaqëkunawan, terremötokunawan, tukïlaya qeshyakunawan... Cristupa qateqninkunaqa chikishqam y maqashqam kayanman karqan; y wakintanäqa wanutsiyanmanmi karqan. Uli o llulla profëtakunam mana alli rurëman apayanman karqan atskaq cristianokunata. Y nunakunapa kuyakïnimpis ushakanmanmi karqan.
2. ¿Imanirtaq alläpa kushikïpaq hinantin Patsapa willapäkïkanqantsik?
2 Tsëkuna pasanan këkaptimpis, hinantin Patsapa willapäkuyänampaq Jesus nenqantam, qateqninkuna imanöraq tsëqa Diospa Reinompita willapäkushun niyarqan (Mat. 24:3-14). Kananqa rikëkantsikmi llapan Jesus nenqan cumplikëkanqanta. Mantsëpaq tiempokuna kaptimpis, kushishqam Jehovapa testigonkunaqa alli noticiapita willapäkïkantsik. Nunakunapa kuyakïninkuna ushakaptimpis, noqantsikpa kuyanakïnintsikqa imëpitapis masmi mirëkan. “Llapan nacionkuna” chikimashqapis, hinantin nacionchömi willapäkïkantsik.
3. ¿Ima alli ruranqantsiktaraq tarintsik hinantin Patsapa willapäkonqantsik informechö?
3 Pasaq watachö Jehovapa testigonkuna willapäkuyanqan informeqa këkan, 3 a 6 päginakunachömi. Këta rikarninmi alläpa kushikuntsik. Y 16 watanam, mil millón hora willapäkushqantsik y Bibliapita yachatsikushqantsik. ¡Këmi fënintsik kanqan rikätsikïqa! Pasaq 2006 watachömi 642.182 precursorkuna kayashqa, y 2007 watachönam 678.638, y 2006 watachömi publicadorkuna kayashqa 6.741.444, y 2007 watachönam 6.957.854, y 2006 watachömi 6.286.618 estudio biblicota dirigiyashqa, y 2007 watachönam 6.561.426. Y 2006 watachömi 248.327 bautizakuyashqa, y 2007 watachönam 298.304. ¡Alläpa kushikïpaqmi casi siete millones nunakunana Jehovata servikanqantsik! ¡Imëpitapis más! ¿Ima hukkunatayantaq tarintsik tsë päginakunachö?
4. ¿Ima viciokunataraq huk nuna haqerqan bautizakunampaq?
4 Kë llapan ruranqantsik kushikïpaq kaptimpis, manam qonqashwantsu fënintsik kanqanrëkur ruranqantsikta. Huk shumaq pasanqanta rikärishun. Guillermoqa Boliviapitam. Yurikorqan 1935 watachömi y 9 watayoq kanqampitam trabajarqan coca murïcho. Wambra kanqampitam, trabajocho alleq tsarakunampaq cocata chaqchar yachakashqa karqan. Tsëpitanam machar y cigärrota shoqur qallarqan. Jehovapaq mana alli kanqanta yachakurirnam, Guillermoqa haqirerqan machëta y cigarro shoqïta. Alli unëtaran chaqchar yachakäkushqanta haqerqan. Diosman atska kuti mañakur-ran, tsëta haqirerqan. Y bautizakurerqan llapan viciokunata haqirir-ran. Kananqa kënömi nin: “Llapan viciokunapitam limpiona kä y kushi kushinam kawakö”.
5. ¿Imataraq nunakunapaq munantsik?
5 Jehovaqa alläpam kuyan nunakunata. Y hutsankunata haqiyänantam munan (2 Ped. 3:9). Tsënö rurayänantam noqantsikpis munantsik. Tsëmi nunakunata yanapëta munantsik Jehovaman witiyänampaq, y noqantsiknö kuyayänampaq.