Tapukïkuna kaq

◼ ¿Allitsuraq atiendekuyanman Jehovapa testigonkuna, religiösokunapa hospitalninchö o tsatsakunata täpayanqan wayikunachö?

Atska religiosokunapam kan hospitalninkuna y tsatsakunata wätayänan wayinkuna, tsëpis, wakinqa manam religionninkunaman yëkuyänanrëkurtsu rurayashqa (Apo. 18:2, 4). Tsëpa rantenqa, qellëninkuna más ëlluyänampaq o qoriyänampaqmi patsätsiyashqa. Wakin hospitalkunachöqa shutinkunallanam këkan, y wakinkunachönam religiösokunapis trabajëkäyanraq.

Religiösokunapa hospitalninkunaman o tsatsakuna wätayanqan wayinkunaman ëwanapaq o mana ëwanapaqpis, kikintsiknam rikänantsik. Concienciantsikpitanachi ëwanantsik o mana ëwanantsikpis (1 Tim. 1:5). Tsëmi ëwanapaq o mana ëwanapaqpis, puntataqa alleqraq rikänantsik.

Itsa täranqantsikpaqa religiösokunapa hospitalninlla kan. O huk hospitalkuna kaptimpis, itsa tsë hospital-lla alli atiendekuyanqampita reqishqa kayan. Hinamampis, itsa tsë hospital-llapa alli mäquinankuna kan, o alli doctor o operakoqkuna kan. Wakin hospitalkuna yawarta mana churakonqantsikta mana respetayaptimpis, itsa religiösokunapa hospitalnenqa respetayanman. Mëqan hospitalkunamampis atiendekoq ewëta munarqa, këkunatam alleq rikänantsik.

Religiösokunapa hospitalninkunaman o awkinkunata täpayänan wayikunaman ëwaq kaqqa, itsa niyanman, atiendeyämanqanllapitam paguëkä. Itsa wakinqa, religiösokunapa hospitalnin kaptimpis, atiendeyämanqanllapita paguëkarqa, manam ni imanöpapis yanapëkätsu ulikoq o llullakoq religionkunata niyanman. Tsëpenqa, atiendenqanllapitam o hampillapitam paguëkan.

Tsë wayikunachö atiendekurqa, huk cristiano rikänanmi ni imanöpapis uli o llulla religionman mana mëtikunampaq. Hina manam ni tsëchö trabajaqkunata o chaqkunatapis “Padrecito” ni “Madrecita” ninmantsu (Mat. 23:9). Tsëman ëwarnenqa yarpänëki hampiyäshunëkirëkurlla, o atiendeyäshunëkirëkurlla tsëman ëwanqëkita.

Tsë hospitalcho këkarnenqa, willakunanmi Jehovapa testigon kanqanta y ancianokuna watukayänanta munanqantapis. Tsënöpam qeshyëkaq wawqi panikunata watukarnin shumaq yanapayanqa (1 Tes. 5:14).

Testigo kaq kastankuna, ancianokuna y congregacionchö wakin wawqi panikunapis, rikäyänanmi tsatsakunata wätayanqan wayikunachö kayaptenqa, y religiösokunapa wayinchö kayaptinnäqa masmi rikäyänan, tsënöpa Jehovapa kaqcho alli kayänampaq. Këkunacho mäkoq mäkoq kashqaqa, yanapëkäshunmi tsatsakunata, mana mëtikuyänampaq religiösokunapa costumbrenkunaman, o celebracionninkunaman o ima rurëninkunamampis.

Këkunata musyarmi, llapantsik alleq rikänantsik më hospitalman ëwanapaqpis o tsatsakuna täpayänan wayikunata akranapaqpis (Gál. 6:5).