Jehoväpa Testïgonkunata Pushaqkunapa cartan
Noqakunawan Diosta sirveq kuyashqa wawqikuna y Panikuna:
¡Alläpam kushikuyä qamkunaman cartakamur! Apóstol Juannömi noqakunapis qamkunata “llapan shonqüwan cuyayaq” wawqikuna panikuna, hina pënöllam kushikuyä ‘rasonpa caqcho quecayanqëquita’ (2 Juan 1, 4). Rasumpa kaqchö këkanqantsikqa llapantsikpaqpis alläpa hatun bendicionmi. Tsënöpam yarqukurerquntsik Diosta piñatseq Hatun Babiloniapita, yachatsikïnimpita y costumbrenkunapita. Diosta wiyakonqantsikmi yanapamarqontsik kuyakoq kanapaq, alli kanapaq y ankupäkoq o llakipäkoq kanapaq. Hina, rasumpa kaqta yachakonqantsikmi yanapamarqontsik Diospa rikëninchö alli kanapaq, y mana wanushpa kawakïta shuyaränapaq.
Jehová llapan hunaqkuna alli kaqta ruranapaq y alli tsarakunapaq santo espïritunwan yanapamanqantsikta alläpam kushikuntsik. Kushishqachi këkäyanki pasaq asambleachö Diosnintsik shumaq yachatsimanqantsikpita. Tsë hatun asambleapa tëmanqa karqan “Diospa santo espïritunmi yanapamantsik”. Kë mundo imëpitapis más mana alliman chäkïkaptinmi Diospa Santo espïritunman yärakunantsik o markäkunantsik alläpa precisan, tsënöpa sasa o aja kawëkunacho alli tsarakunapaq.
Diosta kuyayanqanrëkur wawqintsikkunata panintsikkunata tukïta rurayanqanta Anuariochö leinqantsikmi, más tsarakunapaq yanapamantsik. Y wakinkunaqa tukïta pasayarqan, tsëllaraq bautizakushqa këkar o manaraq bautizakurmi. ¡Imanömi kushitsimantsik allikaqpaqrëkur tsarakuyanqan y Diosllapaq kayanqan! Tsë rurayanqankunam yanapamantsik imëkata pasarpis Diospa Gobiernonrëkur alli tsarakunapaq (1 Tes. 1:6-8).
Musyëkäyämi kuyashqa wawqikuna panikuna qellë tariyänëki alläpa ajaraq kanqanta, y imëka mana allikunata pasarnimpis familiëkikunawan kushishqa kayänëkirëkur sinchikïkäyanqëkita. Wakinkunapaqqa alläpa ajaraqmi Diospita yachatsikoq yarquyänan y congregacionchö alli yanapakuyänan. Tsërëkurmi Diosman mañakïkur y alli estudiëkur, 1 de enero de 2009 watapita qallëkur kima reunionkuna hukllachö kanampaq rurayämorqö. Kë rurayämonqäkuna yanapayäshunëkita, hina hapallëkikunalla y familiëkikunawan alli estudiayänëkipaq tiempïkikunata shumaq patsätsiyänëkitam munayä.
Diosnintsik nenqanta wiyakur, hatumpis ichikpis asambleakunachö bautizakuyanqanta musyarir alläpam kushikuyarqä. Teytakuna mamakuna, wambrëkikunata rasumpa kaqta kuyayänampaq yachatsiyanqëkita, y wambra kayanqampita Jehoväta serviyänampaq yanapayanqëkitapis alläpam kushikuyä. Imëkakunata escuëlachö pasëkarpis kë wambrakuna bautizakuyanqanmi rikätsikun wayichö alli yachatsiyanqëkita (Sal. 128:1-6).
Hina manam qonqariyätsu Bibliapita yachakïkaqkuna más miranqanta, y tsëpaqqa alli yanapakuyashqa misionerokuna y precursor especialkunam. Llapä Jehoväpa Testïgonkunata Pushaqkunapaqqa, alläpam välin wawqikuna panikuna llapan patsachö alli yanapakïkäyanqan, tsënöpa alli shonquyoq nunakuna ‘cawatsicoq yacuta debaldilla upoq’ shayämunampaq (Apo. 22:17). Alläpa kushishqam chaskirintsik qanyan wata 289.678 bautizakurir Diospa markanman yëkamoqkunata.
Apóstol Juan kënö nenqantaqa allim yarpärinantsik: “Que mundoqa llapan mana alli munenincunawan ushacäreqllam; peru Diospa muneninta ruraq nunaqa wiñepam cawanqa” (1 Juan 2:17). Kë mundo ‘ushcänanpaq’ ichikllana pishikanqan witsanchömi kawantsik, tsëmi Diospa munëninta ruranapaq churakänantsik, y ‘mäcoq, mäcoqlla quecanantsic’ (Mat. 24:42). Tsënö ruranqantsikpita manam ni imëpis pësakushuntsu; hinamampis kuyakoq Diosnintsik Jehová manam haqimäshuntsu (Isa. 63:7).
Hinamampis më tsëchö wawqikuna panikuna alli tsarakuyanqanta Anuariochö leiyanqëkikuna yanapayäshunëkitam munayä, tsënöpa Diospa kaqta puntaman churayänëkipaq. Ama qonqayëtsu, noqakunaqa qamkunata alläpam kuyayaq, qamkunapaq imëpis yarparëkäyämi y Teyta Diosman mañakïkäyämömi. Llapan allikunata Jehová qoykuyäshï.
Jehoväpa Testïgonkunata Pushaq
Wawqikikuna turikikuna