Tapukïkuna kaq

◼ ¿Imanöraq yanapakushwan reunionkunachö yachatsikayämunqanta shumaq wiyakunapaq? (Deu. 31:12.)

Jehoväta, y reunionkuna kanampaq patsätsimunqanta respetanqantsikta rikätsikunantsikrëkurmi tempränolla chänantsik, tsënöpa pë yachatsikamunqanta wiyakunarëkur listo këkänapaq. Puntallaman täkïmi más alliqa, tsënöpa pishi wambrayoqkuna y hora tardeyämoqkuna qepaman hamakuyänampaq. Manaraq reunión qallaptinmi celularkunata upitsiyänan, tsënöpa wiyakuyänanta mana pantatsinampaq. Tsënö Jehoväta respetanqantsikta rikätsikushqaqa, manam alläpaqa bulla kanqatsu reunionkunachö (Ecl. 5:1; Fili. 2:4).

Bibliapita yachakïkaqkuna reunionman shamur qallayaptinqa, reqinakuyanqan kaq wawqi o panim pëkunawan täkunman. Tsënö rurëqa alläpa allim kanqa yachakïkaqkuna pishi wambrankunawan shayämuptinnäqa. Reunionnintsikkunachö imëpis mana kashqa karninqa itsa penqakuyanqallaraq, y qepallaman täkïta munayanqa. Tsëqa wambrankuna waqaptin watata huk rato horqarnimpis wakinkuna wiyakuyänanta manam pantatsiyanqatsu (Pro. 22:6, 15). Yachatsikuyänan Wayichö taksha sala kaptinqa manam tsëman wambrayoqkuna täkuyanmantsu, tsënöpa wambrankuna tsëchö büllata rurar mana kakuyänampaq. Más alliqa kanman, teytan kar o maman karpis wambranta willapänampaq o yätsinampä huk rato waqtaman horqarirnin wanayanqanchö yanaparirnin ruriman kutitsimunqanmi.

Hina acomodadorkunapis yanapakuyanmi Yachatsikuyänan Wayichö reunión shumaq rurakänampaq. Pëkunaqa atska familiayoqkunata y hora tarde chämoqkunatam asientonkuna ashir yanapayan, tsënöpam acomodadorkunaqa wakinkuna wiyakïkaqta mana pantatsishllapa reunionman chämoqkunata shumaq yanapayan. Illaqpita ima bulla kaptimpis shumaqllam pëkunaqa atienderiyan. Huk wambra mana alli portakurnin wakinkuna shumaq wiyakuyänanta pantatsiptimpis, shumaqllam yanapariyan.

Rikärinqantsiknöpis, Jehová imanö kanqanta, allikunata ruramunampaq kaqta, y yamë kawakïta apamunampaq kaqta reunionkunachö shumaq yachakunapaqqa, llapantsikmi yanapakunantsik (Heb. 10:24, 25, QKW).