Alläpa kushitsikoq rurë
1. ¿Imachötaq kanan witsan nunakunata yanapëkantsik?
1 Unë tiempochömi Jesus qeshyaqkunata kachakätseqta rikar nunakuna alläpa kushikuyarqan (Luc. 5:24-26). Tsënöllam kanampis, alläpa kushikïpaq Jehoväta reqiyänampaq nunakunata yanapëqa (Apo. 22:1, 2, 17). Alläpa kushikïpaqmi, Diospa Palabran y santo espíritu nunakuna kawëninta altsayänampaq yanapanqanqa. Pero más kushikïpaqqa nunakunata estudiatsirnin yanapakushqa yachakuyanqanmannö kawaqta rikëmi.
2. ¿Imanötaq sientekuntsik pillatapis Bibliapita yachatsirnin?
2 ¿Imataq Diospa shutin? ¿Imanirtaq hipakïkuna kananta Dios haqin? ¿Imataraq nunakunapaq ruranqa Gobiernonchö? Alläpam kushikuntsik kë tapukïkunapa respuestanta yachatsikurnin, pero masran kushikuntsik Bibliapita yachëkätsinqantsik nunakuna kushikunqanta rikar (Pro. 15:23; Luc. 24:32). Hinamampis kushikuntsikmi Diosta shutimpa qayar qallaptin, shumaq altsapäkuptin, vestikuptin, mana alli rurëninkunata haqiptin, y yachatsikur qallëkuptin. Y Diosta qamllapaqnam kashaq nirir bautizakurqa cristiano mayintsikmanmi tikrarin. Y tsë ruranqankunata rikarqa alläpam kushikuntsik (1 Tes. 2:19, 20).
3. ¿Imatataq rurashwan huk estudio biblicota tarinapaq?
3 ¿Yanapakunkimanku? Kë kushikïpaq rurëchö yanapakïta munarqa, Jehovätam mañakunëki huk estudio biblicota tarinëkipaq yanapëkushunëkipaq, tsëpitam sinchikunëkï mañakunqëkinö ruranëkipaq (1 Juan 5:14). Yachatsi nunakunata tarinqëki sitiokunachö. Më tsëchöpis yachatsikunqëki hora estudio biblicota qallëta tïrë (Ecl. 11:6). Sitsum qam tarinki Bibliapita yachakï munaqta, y shonqunman muruta mururirqonki, tsëqa kuti qarpaq o parqoq cuenta más yachatsinëkipaq (1 Cor. 3:6-9).
4. ¿Imanirtaq alläpa precisan nunakunata Bibliapita yachatsinantsik?
4 Hinantin Patsachö atska nunakunaran kayan Diospita yachakïta munaqkuna. ¿Pitaq kë nunakunata yanapanqa Bibliapita yachatsirnin? (Mat. 5:3, 6.) Shonqupita patsëmi yanapakïta tïranantsik nunakunata yachatsirnin, manaraq cosecha tiempo ushakaptin (Isa. 6:8).