Profëtakunapita yachakushun: Joel
1. ¿Imanötaq Joelpa humildi këninta qatishwan yachatsikunqantsikchö?
1 ¿Pitaq profëta Joelqa karqan? Jutinta apaq libruchöqa “Petuelpa tsurin” kanqanllatam pëqa willakun (Joel 1:1). Kë humildi profëtaqa Jehoväpa willakïnintam imapitapis mas precisaqpaq churarqan y manam profëta kanqantatsu precisaqpaq churarqan. Y noqantsikpis tsënöllam rurantsik. Yachatsikunqantsikchö reqishqa y alabashqa këta ashinantsikpa rantinmi, Jehoväta y Palabranta mas reqiyänanta ashintsik (1 Cor. 9:16; 2 Cor. 3:5). ¡Imanö alläpa yanapakoqmi kë yachatsikunqantsikqa! Joelpa wakin willakïninkunata rikärishun gänas gänaslla yachatsikunantsikpaq y shamoq tiemputa kushishqa shuyänapaq.
2. ¿Imatataq rurashwan Jehoväpa piñakïnin junaq këllachöna këkaptinqa?
2 “Jehoväpa piñakïnin junaqqa këllachönam.” (Joel 1:15.) Kë willakunqankuna 3.000 watakunana pasarishqa kaptimpis, kanan tiempuntsikchöpis cumplikëkanmi. Kë Patsachö imëka mas mana allikunam mirakïkan, yachatsikunqantsikkunachöpis burlakuyanmi y wiyakïtapis manam munayantsu. Këmi rikätsikun alläpa sasa (aja) kawakï tiempuchöna këkanqantsikta (2 Tim. 3:1-5; 2 Pëd. 3:3, 4). Ushakë junaq këllachöna kaptinmi, yachatsikïtaqa imëkapitapis mas puntaman churanantsik (2 Pëd. 3:11, 12).
3. Alläpa jipakï (ñakay) tiempu këllachöna këkaptinqa, ¿imanirtaq alläpa precisan yachatsikïchö ocupädu këkänantsik?
3 “Jehoväqa markampa tsapaqninmi kanqa.” (Joel 3:16.) Kë versïculuqa nin: “Ciëlupis patsapis kuyukunampaq” kaqtam, tsëchöqa alläpa jipakï (ñakay) tiempuchö juiciuta rurakänampaq kaqpaqmi parlëkan. ¡Imanö kushikïpaqmi sirweqninkunata Jehovä salvanampaq kaqta musyëqa! (Apoc. 7:9, 14.) Yachatsikïchö ocupädu karnin, y Jehovä yanapamanqantsikta y kallpata qomanqantsikta rikanqantsikmi yanapamäshun pëman mas markäkunapaq (yärakunapaq) y imëkata aguantanapaq, tsënöpa alläpa jipakï (ñakay) tiemputa kawëkar pasanapaq.
4. ¿Imanirtaq shamoq tiemputa kushishqa shuyäkushwan?
4 Mana allikunalla pasanampaq kaqta willakoq kanqanta Joelpaq niyaptimpis, pëqa jina rikätsikunmi Diospa markan imanö salvakunampaq kaqtapis (Joel 2:32). Tsëmi shamoq tiemputa kushishqa shuyäkushun, Diospa alli willakïninkunata gänas gänaslla yachatsikushun y Joel 2:23 textuchö “Jehovä Diosnikikunarëkur kushikuyë” nimanqantsikta kushishqa chaskikushun.