Noviembrichö llapankunapaq alli willakï: 38 kaq Diospa Gobiernumpita willakïkuna
1. ¿Ima tapukïkunatataq mëtsikaq nuna wanïpaq rurakuyan, y pëkunata yanapanapaq imatataq noviembri killa rurashun?
1 Imata niyaptimpis, wanïqa llapantsikpa chikimaqnintsikmi (1 Cor. 15:26). Mëtsika nunakunam tapukuyan, “¿Kuyashqa kastäkuna wanurir imanöraq këkäyan? ¿Imëllapis rikëta yapë puëdishaqtsuraq?” nirnin. Pëkunata yanapanapaqmi, “¿Wanushqakuna kawariyämunqatsuraq?” neq 38 kaq Diospa Gobiernumpita willakïkuna tratäduwan entëru Patsachö yachatsikushun. 1 de noviembrim yachatsikur qallashun y tsë killa entërum kanqa. Tsë killa ushariptimpis, sïguikäshunllam kë tratäduwan yachatsikurnin.
2. ¿Imanötaq 38 kaq Diospa Gobiernumpita willakïkuna tratädu?
2 Tratädu imanö kanqan. Kë tratädutaqa rurayämushqa ishkëman doblanapaqmi. Qaranchö precisaq tïtulu y “¿Ima ninkimanraq? ¿Awmi? ¿Manam? ¿Itsapis?” neq tapukïkunam kan. Tratäduta kicharirninmi, leyeqqa, Biblia yachatsikunqanta y ¿imanötaq këta musyanqantsik yanapamäshun? neq tapukïta rikärinqa. Jina, ¿Biblia ninqanman creishwantsuraq? neq tapukïtapis rikärinqam. Y qepanchö këkaq päginachömi, mas yachakïta munanampaqnö tapukïta taririnqa.
3. ¿Imanötaq yachatsikushun 38 kaq Diospa Gobiernumpita willakïkuna tratäduwan?
3 Llapan territoriukunaman chäshun. Jesus Wanunqanta Yarpëpaq y jatun asamblëapaq invitakunqantsiknöllam kë tratädutapis qokushun. 2013 wata 1 de abril killa anciänukunapaq carta ninqannöllam, pëkuna nimäshun llapan territoriukunaman imanö chänapaq kaqta. Ichiklla territoriukunayoq congregacionkunaqa amänunchö këkaq congregacionkunatam yanapëta puëdiyanqa. Tratäduta jorqarninqa, tsë semänapaq wanayanqanllatam Diospita yachatsikoqkuna apayanman. Territoriuntsikkunata usharishqa tratädukuna sobraptinqa, cällikunachöpis qokïta puëdishunmi. Noviembri killa manaraq ushaptin tratädukuna ushakäriptinqa, Rasumpëpaqa, ¿imatataq Biblia yachatsikun? libruta o ¿Rasumpa kaqta musyëta munankimantsuraq? tratädutam qokushun. Noviembri killapa qallanan säbadu estudiu biblicuta qallanapa rantinmi tratäduta qokushun. Munayaptinqa semäna ushëkunapis revistakunata jaqita puëdishwanmi. Kananllapitana kë shumaq yachatsikïchö yanapakunapaq alistakïkäshun.