Profëtakunapita yachakushun: Osëas
1. ¿Imata ruranapaqtaq yanapamantsik Jehoväpa kuyakïnin y llakipäkoq kënin?
1 Jehovä alläpa alli y llakipäkoq kanqanman yarpachakunqantsikqa itsa kënö tapukunapaq yanapamäshun: “¿Përëkur ima sacrificiukunata ruranapaqtaq listu këkä?” (Sal. 103:2-4; 116:12). Jehoväta cäsukunanrëkurmi profëta Osëasqa shonqupita patsë imëka sacrificiukunata rurarqan. ¿Imanötaq qatishwan ruranqankunata?
2. ¿Imanötaq Osëasqa mana jaqipa yachatsikunqanta qatishwan?
2 “Mana alli tiempuchopis” yachatsikïkäshun. Osëaspa willakïninqa Israelpa chunka kaq kastankunapaqmi karqan. Tsëchöqa juk ishkëllam Jehoväta sirwiyaq. “Jehoväpa rikënimpaq mana alli kaqkunatam” rey Jeroboán II rurarqan, y nunakuna becërrukunata adorayänampaq Jeroboán I qallanqantapis rurar sïguikarqanllam (2 Rëy. 14:23, 24). Pëpa rantin yëkoq reykunaqa manam ni imata rurayarqantsu tsë llapan mana alli rurëkunata altsayänampaq, tsëmi manaraq Jesus shamuptin 740 watachö tsë marka ushakarqan. Mëtsika dioskunata adorayanqan witsankunachömi Osëasqa 59 watapa mana jaqipa Diosta sirwirqan. ¡59 watakunapa! ¿Nunakuna wiyakïta mana munayaptin o chikir qatikachëkämashqapis watakuna pasanqanmannö Osëasnötsuraq yachatsikurlla sïguikäshun? (2 Tim. 4:2.)
3. ¿Imanötaq Osëaspa kawënin rikätsikun Jehovä llakipäkoq kanqanta?
3 Jehoväpa llakipäkïninman yarpachakushun. Jukwan engañanqan warminta perdonëkunampaqmi Osëasta Jehovä nirqan (Os. 1:2). Warmin Gomerwanmi Osëaspaqa juk wamran kapurqan, peru tsëpita yureq ishkë kaq wamrankunaqa itsa pëpatsu karqan. Osëasqa warmin jukwan engañashqa këkaptimpis listum këkarqan perdonanampaq, y pë ruranqanmi rikätsikurqan Jehoväpis alläpa kuyakoq y llakipäkoq karnin arrepentikushqa Israel markanta perdonanqanta (Os. 3:1; Rom. 9:22-26). ¿Listuku këkantsik imëka sacrificiukunata ruranapaq y tukïläya nunakunata Jehovä alläpa llakipäkoq kanqanta yachatsinapaq? (1 Cor. 9:19-23.)
4. ¿Ima sacrificiukunatataq rurashwan Jehoväta agradecikurnin?
4 Jehoväpa wakin sirweqninkunaqa Diospita yachatsikuyänanrëkurmi profesionninkunata y alli pagashqa trabäjunkunata jaqiyashqa. Wakinkunanam casakuyashqatsu o wamrankuna kayäpushqatsu Diospa kaqchö mas yanapakuyänanrëkur. Awmi itsa noqantsikqa Osëas ruranqannöqa rurëta puëdishuntsu. Peru rasumpa kaqchöqa, Jehovä alläpa llakipäkoq kanqantam agradecikuntsik y markäkuntsikmi santu espïritunwan kallpata qomänapaq kaqta, itsa Osëastanöpis mana pensanqantsik rurëkunachö yanapakunapaq utilisämashwan (Mat. 19:26; Filip. 2:13).