Enërupita patsëmi “Dios Yayapa kuyakïninchö imëpis kawakuyë” librupita yachakur qallëkushun
1. ¿Imachö yanapamänapaqtaq rurayämushqa “Dios Yayapa kuyakïninchö imëpis kawakuyë” libruta?
1 6 de enëru semänapita patsëmi, Bibliapita Yachakunapaq reunionchö yachakur qallashun “Dios Yayapa kuyakïninchö imëpis kawakuyë” librupita. ¡Imanö kushishqam tsë junaq chämunanta shuyarëkantsik! Jehoväpa Testïgunkunata Pushaqkuna Diosta kuyaqkunaman cartakuyanqanchömi, tsë librupaq kënö nin: “Llapan shonqükunawanmi munëkuyä, Dios Yayapa kuyakïninchö imëpis kawakïkänapaq kë libru yanapëkamänantsikta, y mana wanushpa kawakïman chänapaq (Jüdas 21)”.
2. ¿Imakunachöraq yanapamäshun kë libru?
2 Imakunatataq yachakushun. Amïgukunata akranqantsikchö, kushikunapaq imatapis ruranqantsikchö, autoridäkunata respetëchö, yachakashqa rurënintsikkunachö, casädu këchö, parlakïnintsikchö, costumbrikunachö, ¿imanöraq Biblia ninqan yanapamäshun? Kë librupita yachakurmi, Biblia ninqannölla concienciantsikta yachatsishun Dios munanqannö kawakunapaq (Sal. 19:7,8). Dios imanö pensanqantapis alli yachakurirmi, kushitsita munar imëka rurënintsikchöpis pëta wiyakushun (Prov. 27:11; 1 Juan 5:3).
3. ¿Imanirtaq Bibliapita Yachakunapaq reunionkunachö parlakïta procurashwan?
3 Tapukayämuptin parlakurinapaq preparakushun. Ëllukashqa (qorikashqa) Markanchö Diosta alabanapaq puntallapitana preparakï (Heb. 13:15). Yachakunantsikpaq kaq wallkalla kaptinmi, puntallapitana llapantsik alli yachakunantsik, tsënöpa yachakunqantsikpita mana mantsakushpa parlakunapaq. Jina, puntallapitana alli yachakïkur y wallka tiempullachö parlakurninmi yanapanakushun alli kaqta ruranapaq y kuyanakunapaq, jinamampis alli preparakunqantsikqa shumaq y alli yachakunapaqmi yanapamäshun (Heb. 10:24). Y parlakunqantsikwan markäkïnintsikta rikätsikurqa, kushishqam kashun.
4. ¿Jehoväpa mandakïninkunata wiyakunantsik imanirtaq alläpa precisan?
4 Diosta kuyarqa mandakunqankunatam wiyakunantsik, tsëtam Jesus yachatsikorqan wanukunan paqas (Juan 15:10). “Dios Yayapa kuyakïninchö” librum yanapashun imëpitapis mas Biblia ninqanta ruranapaq, y ‘Dios Yayapa cuyacuyninchö imaypis cawacunapaq’ (Jud. 21, NTCN).