“Puntataqa creikoq mayikiwanraq amishtë”

Jesus kawanqan witsanchö këkanqëkiman pensarï. Galilëachömi këkanki, y Ramäda fiestamanmi Jerusalenyaq ëwarqunki. Më tsëpitam creikoq mayikikuna ëwayashqa, y Jerusalenchöqa mëtsika nunakunam këkäyan. Jehoväpaqmi ofrendata apëkanki. Tsëmi chiwata aparkur, kichki cällikunapa templuman chëta munar ëwëkanki. Y templuman chärirnam rikärinki, qamnölla ofrendankunata qoyta munaqkuna tsëchö junta këkäyanqanta. Y tsënö këkaptinnam, ofrendëkita qonëki höra chäramun. Peru itsapis tsë höra yarpärinki creikoq mayiki qamwan piñashqa këkanqanta. ¿Imataraq rurankiman? Jesusmi tsënö pasakuptin imata ruranapaq kaqta willakurqan (leyi Mateu 5:24). Jesus ninqanta cäsukuyänëkipaq y yamë kawakuyänëkipaqqa, ¿imataraq qam y piñashqa këkaq cristiänu rurayankiman? Këkunapita mëqanta ruranapaq kaqta markë.

¿IMATARAQ RURANKIMAN?

• Piñashqa këkaq cristiänu mayikiwanqa rasumpa piñatsishqa kanqëkita pensarllaku parlankiman.

• Imallapitapis ras piñakoq karnin pantashqa këkanqanta o pëpis culpayoq kanqanta cuentata qokunampaqku parlapëta tïrankiman.

• Imanir piñashqa këkanqanta mana entiendir o mana munëkar llakitsishqa karnimpis, shonqupita patsëku disculpakunkiman y parlakamunqan höraku shumaq wiyankiman.

¿IMATATAQ PIÑASHQA KËKAQ CRISTIÄNU RURANMAN?

• Imanö piñatsinqëkitatsuraq congregacionchö willakunman, favornin yarquyänanta munar.

• Llapan pasanqanta yarpëkuryantsuraq, culpayoq kanqanta cuentata qokunampaq rikätsita tïranman.

• Humildi kanqëkirëkur y pëwan parlaq ëwanëkipaq alläpa valorta wananqëkirëkurtsuraq, shonqupita patsë perdonashunkiman.

Kanan witsan Diosta adoranapaq ofrendakunata mana qoshqapis, ¿imatataq Jesus rikätsikurqan cristiänu mayintsikwan yamë këpita y adoracionnintsikta Dios chaskinqampita?