DIOSNINTSIKTA ALLI SIRWINAPAQ
Jatun asamblëakunachöqa kuyakoq kanqantsiktam rikätsikuyta puëdintsik
Israelïtakunaqa fiesta rurayanqanchömi mëtsikaq juntakäyaq. Tsënö kaqllam noqantsikpis, kanan witsan jatun asamblëantsikchö juntakantsik. Tsëchöqa Jehovä Diospitam yachakuntsik y familiantsikkunawan y amïguntsikkunawan juntu këtapis puëdintsikmi. Tsëmi kiman o kimsan junaq asamblëantsikman ëwanapaq tiempuntsikta shumaq patsätsintsik.
Asamblëantsikkunaman ëwarqa manam kikintsikllamanqa yarparäkunantsiktsu, sinöqa wawqi panikunapaq yarpachakunqantsiktapis rikätsikunantsikmi (Gäl 6:10; Heb 10:24, 25). Tsënö kanqantsiktaqa rikätsikuntsik, kikintsiklla jamakunantsikpaq asientuta rakirninmi. Y asamblëantsikman shamoqkunata shumaq yanaparninmi (Flp 2:3, 4). Y asamblëantsikchöqa wakin wawqi panikunatapis reqita puëdintsikmi. Tsëqa, ¿imanirtan asamblëa manaraq qallaptin o ushariptin o almorzanqantsik höra pillawampis parlakurinapaq churapakantsiktsu? (2Co 6:13). Tsë asamblëakunachö reqinakunqantsikkunawanqa imëpis amïgum këkäshun. Juk familianölla kanqantsikta rikarninmi, wakin nunakunapis Jehovä Diosta sirwita munayanqa (Jn 13:35).
MË TSË NACIONKUNAPAQ ASAMBLËAKUNA, “KUYAKÏQA MANAM IMËPIS USHAKANTSU” NEQ VIDEUTA RIKÄRIR, KË TAPUKUYKUNATA CONTESTË:
2019 watachö juk nacionpita asamblëakunaman shamoq wawqi panikunataqa, ¿imanötan kuyayanqanta rikätsikuyashqa?
¿Imanirtan Jehoväpa sirweqninkunaqa kuyanakur juknölla kayan?
Jehoväpa Testïgunkunata Pushaqkunaqa, ¿ima niyarqantan kuyakuypaq?
Asamblëakunachöqa, ¿imanötan kuyakoq kanqantsikta rikätsikushwan?
Alemaniachö y Corëa del Surchöqa, ¿imanötan kuyanakuyanqanta rikätsikuyarqan?
¿Imata ruranapaqtan listu këkänantsik?