10 Markäkïpaq kë

¿IMA NINANTAN?

Niyanqanta wiyakoq, änikunqanta ruraq y rasumpa kaqllata parlakoq jövinmanqa teytankuna, amïgunkuna y patronnimpis markäkunqam o yärakunqam.

¿IMANÖTAN YANAPAMANTSIK?

Markäkïpaq o yärakuypaq kaptikiqa, manam llapan ruranqëkitatsu rikärëkäyämunqa.

Säram nin: “Teytëkikuna qamman confiakuyänanta munarqa, allita ruranëkipaq kallpachakuy, y ama pëkunawan këkanqëki hörallaqa”.

BIBLIACHÖ YACHAKUNQANTSIK: “Kikikikuna imanö kayanqëkita rikätsikurnin sïguiyë” (2 Corintius 13:5).

¿IMATATAN RURANKIMAN?

Teytëkikuna qamman markäkayämunanta o yärakayämunanta munaptikiqa, këkunata ruranqëkim yanapashunki:

Rasumpa kaqllata parlë. Rasumpa kaqta mana parlakuptikiqa, manam imëpis creiyäshunkitsu. Peru mana allita rurashqa karpis rasumpa kaqllata parlakuptikiqa, masmi qamman markäkayämunqa o yärakayämunqa.

Carlusmi nin: “Conviënimashqaqa rasumpa kaqta parlakuyqa fäcilmi, peru mana conviënikämashqapis rasumpa kaqllata parlashqaqa markäkïpaqmi kashun”.

BIBLIACHÖ YACHAKUNQANTSIK: “Llapanchöpis alli portakïtam munayä” (Hebrëus 13:18).

Änikunqëkimannö rurë. Estädus Unïduschö tapukuyanqanchömi, mayorïa nunakuna niyarqan, “änikuyanqanta ruraq nunakuna trabäjuta mas tariyanqanta”. Jövin kanqëkipita änikunqëkimannö rurëta yachakurqa, winarirpis tsënöllam ruranki.

Säram nin: “Manaraq imata nimänantsikta shuyarashpa, kikintsiklla imatapis rurashqaqa teytantsikkunaqa masmi noqantsikman markäkuyanqa o yärakuyanqa”.

BIBLIACHÖ YACHAKUNQANTSIK: “Musyämi ninqaqpitapis masta ruranëkipaq kaqta” (Filemon 21).

Pacienciayoq kë. Juk nunapa cuerpun cambiashqa kanqantaqa raslla o sasllam rikärintsik, peru imanö nuna kanqantaqa manam rasllatsu musyantsik.

Brandonmi nin: “Manam juk kuti allita ruraptikillatsu teytëkikuna o wakin nunakunapis qamman markäkayämunqa o yärakayämunqa, peru imëpis allita ruraptikiqa qammanmi markäkayämunqa”.

BIBLIACHÖ YACHAKUNQANTSIK: “Pacienciayoq këta imëka röpatanö vistikuyë” (Colosensis 3:12).