Mana respetakoqmi kayan

**¿IMANIRTAN NUNA MAYINTSIKTA RESPETASHWAN?**

Respetakoq kashqaqa, cölerashqa këkarpis calmakäriyanqam y manam mas problëmakunamanqa chäshuntsu.

Diospa Palabranchömi kënö nin: “Alli shimimpa parlapäriyaptinqa cölerashqa këkarpis alliyäriyanmi, peru qayapëpa parlaparqa masmi cöleratsiyan” (Proverbius 15:1). Pitapis respëtuwan mana parlaparqa o imatapis cöleratsinqanta rurarqa, masmi cöleratsishun y mas problëmamanmi chäshun.
Jesusmi kënö nirqan: “Imatapis pensëkanqantam nunaqa parlan” (Mateu 12:34). Pitapis shonquntsikchö chikiparqa, manam respëtuwan parlapëta puëdishuntsu. Capazchi chikipashwan o despreciashwan juk nacionpita kayaptin, juk costumbriyoq kayaptin o juk kastapita kayaptin. Tsëmi pitapis respetanapaqqa, tsëkunapita chikipanqantsikta o desprecianqantsikta cambianantsik.

Tsëllaraqmi 28 nacionkunapita 32 mil nunakunata tapuyaptin, pullampitapis mas niyarqan kananqa nunakuna respetakuyta manana yachayanqanta.

¿IMATATAQ RURANKIMAN?

Piwan parlarpis respëtuwan parlapë, y qamnö mana pensaptimpis pensanqanta respetë. Pipis parlapäshuptikiqa, ninqankunawan acuerdu kanqëkikunallapita parlapë. Tsënöpam ninqankunapita juzgankitsu ni rimankitsu.

“Ama pitapis juzgayënatsu, qamkunapis mana juzgashqa kayänëkipaq” (Mateu 7:1).

Shumaq tratayäshunëkita munanqëkinölla pëkunatapis tratë. Pitapis respëtuwan parlapaptiki y pëpaq alli kaqta ruraptikiqa, qamtapis tsënöllam tratashunki.

“Alli tratayäshunëkita munayanqëkinölla pitapis tratayë” (Lücas 6:31).

Perdonakoq kë. Imatapis niyäshuptiki o mana gustanqëkita rurayaptinqa, manam pensanëkitsu mana alli kar tsëta rurëkäyanqanta. Tsëpa rantinqa niyäshunqëkita o rurayanqantam qonqëkunëki.

“Alli pensëta yachaq nunaqa, cölerashqa këkarpis calmakärinmi, y ofendiyaptin perdonëkunqanqa alläpa shumaqmi” (Proverbius 19:11).

Jehoväpa Testïgunkunapa Yachatsikuyänan Wayichömi reunion manaraq qallaptin warmipis ollqupis kushishqa saludanakur y parlakur këkäyan.

¿IMATATAQ JEHOVÄPA TESTÏGUNKUNA RURAYÄ?

Mëchö kawarpis o imachö trabajarpis, Jehoväpa testïgunkunaqa llapan nunakunatam respetayä y respetakoq kayänampaqmi pïmëta yanapayä.

Bibliapita yachakuyta munaqkunataqa grätisllam yachatsiyä. Peru manam pitapis obligayätsu noqakunanö pensayänampaq ni noqakunanö creiyänampaq. Tsëpa rantinqa, Bibliachö ninqannömi “yachanëpaq geniuwan y shonqupita respetakur” pitapis parlapëta procurayä (1 Pëdru 3:15; 2 Timoteu 2:24).

Manam pitapis despreciayätsu. Pï nunapis Bibliapita yachakuyta munar reunionnïkunaman shamuptinqa, kushishqam chaskiyä y manam despreciayätsu. Noqakunaqa tukuyläya nunakunatam respetayä (1 Pëdru 2:17).

Autoridäkunatapis respetayämi (Romänus 13:1). Leykunatam cäsukuyä y impuestukunatapis pagakuyämi. Polïtica asuntuman mana mëtikurpis, polïticaman yëkuyta o yanapëta munaqkunataqa manam michäyätsu.