Teyta Dios nunata rurar qallarin

¿IMATATAQ hukläyata rikanki kë dibüjochö? Huk ollquta y warmitam. ¿Piraq rurarqan? Teyta Diosmi. ¿Musyankiku tsë Teyta Diospa shutinta? Shutenqa Jehová ninmi. Y kë rikëkanqëki ollqupash shutin Adán y warmipanash Eva.

Kënöshi Jehová ruranaq Adanta: allpapitash huk perfecto nunapa cuerponta ruranaq. Rurar usharirnash senqampa pükëkunaq, y tsënöpanash Adán kawar qallëkunaq.

Tsëpitanash Teyta Dios mandanaq Adanta llapan tukïläya animalkunapa shutin churanampaq. Itsapis Adanqa alli unëchi animalkunata rikaparqan alli shutinkuna akranampaq. Pero ¿imataraq cuentata qokurerqan animalkunata rikapëkanqanchö?

Llapan animalkuna chinan orqu kayanqantash. Elefantekunapis kayänaq chinan orqush y leonkunapis chinan orqush. Pero Adanqa hapallanllash këkänaq manash kanaqtsu yanaqin. Tsënash, Jehová pasëpa punukäratsinaq Adanta, tsëpitanash, huk tulluta horqarinaq costillampita. Tsë tullupitanash, huk shumaq warmita rurarinaq Adanpa yanaqimpaq.

¡Imanö kushishqaraq tikrarerqan Adán! ¡Imaraq kushïkorqa Eva tsë shumaq huertata rikärirnin! Kananqa wambrankunapis kanmannash kanaq kushishqa pëkunawan täräyänampaq.

Jehoväqa munanaq Adán y Eva wiñeypaq kawayänantash. Kë selläma shumaq Edén huertatanöshi hinantin Patsata rurayänanta munanaq. ¡Imanöraq kushïkuyarqan Adán y Eva kë llapan rurayänanta musyar! ¿Gustashunkimantsuraq karqan kënö shumaq huerta Patsa kanampaq yanapakï? Pero Adán y Ëvapa kushikïninkunaqa manash duranaqtsu. Mä rikärishun imanirshi.