Esclavo kayanqampita hasta Jerusalenpa perqankunata altsayanqanyaq

Babiloniachö esclävonö kawayanqanyaqqa, alläpa sasamanshi pëkunapa fëninkuna churakänaq. Rawrëkaq hornomanshi hitarkuyänaq Sadrac, Mesac y Abednego nishqan jövenkunatapis, pero kawëkaqtash Teyta Diosqa horqaramunaq. Hina, medos y persas nishqan nunakuna Babiloniata ëwaratsiyanqanchönash, leonkuna llawirëkäyanqan uchkuman Danielta hitarkuyänaq, pero tsë leonkunapa shiminkunatapis Teyta Diosshi tsaparkunaq mana Danielta mikuyänampaq.

Tsëpitanash, israelïtakunata kacharinaq Ciro nishqan rey persa. Babiloniachö 70 wata esclavo kayanqampitash israelïtakuna markankunata kutikuyänaq. Y Jehoväpa templontash rurayänaq puntata Jerusalenman israelïtakuna chärerqa. Pero tsëllanash tsë uryakïninkunataqa chikeqninkuna päraratsiyänaq. Y tsëshi, tsë templotaqa ushayänaq 22 wata Jerusalenman kutiyanqanchöraq.

Tsëpitanam, templota shumaqyätsinampaq Esdras Jerusalenman kutenqampita yachakuntsik. Këqa templota ushayanqampita 47 wata pasashqanchönash kanaq. Y Esdras 13 wata kutishqanchönash, Jerusalenpa huchushqa perqankunata altsar yanapanaq Nehemías. Tsënöshi, 152 wata pasarinaq kë PITSQA kaq Parte nishqan willakïkunachöqa.