Reynö Jesús shamun

Y ISHKË wiskukunata kachakäratsirshi, Jerusalenman yëkupäna huk markaman Jesús shamunaq. Tsëchönash: ‘Tsë markaman yëkuriyë, tsëchömi taririyanki huk malta ashnuta, paskarkur aparayämi,’ nishpa ninaq Jesús ishkaq qateqninkunata.

Y ashnun aparayäpuptinnash, montarinaq Jesusqa. Tsënash mana alläpa karuchö këkaq Jerusalén markayaq ashnun montakushqa ëwanaq. Y tsëshi atska nunakuna Jesús chaskeq yarqëkayämunaq Jerusalén markaman yëkupëkaptin. Tsëpitanash, mantankunata qoturir churëkäriyänaq ëwëkanqan näniman llapan nunakunanö. ‘¡Y Jehoväpa shutinchö shamoq reyta Teyta Dios bendecïkutsun!,’ nishpash wakinqa palmërankuna churayäpunaq ëwëkanqanman.

Tsë witsanchöqa, llapan nunakuna rikäyänampaqshi ashnun montashqa Jerusalenman yëkuyaq Israelpa mushoq reyninkuna. Tsënöshi ruranaq Jesús. Y tsëshi reyninkuna kananta munayan kë rikarëkaq nunakunaqa. Pero manash llapan nunanötsu kuyayan Jesustaqa. Mä rikärishun imash pasanaq Jesús temploman ëwanqanchö.

Wiskukunata y maqllukunatash Jesús kachakätsinaq templochöqa. Këta wambrakuna rikärirnash, Jesustaqa kushishqa alabëkuyänaq. Tsënash piñakurkur tsë sacerdötekunaqa, ‘¿wambrakuna nikäyanqanta wiyankiku?,’ nishpa niyänaq Jesusta.

‘Awmi’, ‘“Teyta Diosqa alabanzata horqanqa wambrakunapa shimimpitam,” ¿tsënö Biblia nenqanta manaku ni imëllapis leiyashqa kayanki?,’ nishpash yaskirinaq Jesusqa. Tsëshi Teyta Dios kachamushqan reytaqa wambrakuna alabakïkäyanlla.

¿Kë wambrakunanötsuraq noqantsikpis këta munantsik? Teyta Diospa reinompita willapäkïnintsikta haqirinata itsa wakin nunakunaqa munayanman. Pero noqantsikqa, Jesús llapan allikunata nunakunapaq ruramunampitaqa willapäkïkashwanllam.

Reinar qallëkamunampaqqa manaraqshi tiemporaqtsu kanaq Jesús Patsachö këkaptenqa. ¿Imëraq tsëqa kanqa? Tsëtash musyëta munayänaq qateqninkunapis. Y kananqa tsëtam yachakushun.