Llawirëkäyanqampita yarquriyan

CÁRCEL punku tsarëkaq angelta rikë. Jesuspa apostolninkunatam horqëkan. Imanirshi llawiräyänaq, mä rikärishun.

Jesuspa qateqninkunaman espíritu santota Teyta Dios ramamonqampitaqa ichik tiempollaraqshi pasarishqa kanaq. Pëdrowan Juan tardepëpa temploman ëwayanqanchöshi, llapan kawëninchö qeshyapäkoq huk nunata templo punkunchö taririyänaq. Tsëmanshi llapan temploman yëkoqkunata qellëta mañakunampaq apëkuyaq nunakuna. Tsënash Pëdrotawan Juantapis mañakurinaq wakin nunakunatanö. ¿Imataraq rurayanqa?

Tsënash pëkunaqa shäkurir rikaräyänaq. ‘Manam qellënïqa kantsu,’ pero ‘¡sharkurnin puri Jesuspa shutinchö!,’ nishpash ninaq Pedro. Tsënash derecha kaq makimpita tsarirkur sharkatsinaq tsë nunata, y tsë hörash pintillapa sharkur purir qallëkunaq. Tsëshi nunakunaqa alläpa kushïkuyänaq kë milagrota rikëkur.

‘Jesusta kawaritsimonqan Teyta Diospa poderninwanmi kë milagrotaqa rurayämorqö,’ nishpash ninaq Pedro. Tsëshi tsë religiösokunapa mandakoqninkunaqa Juanwan pë parlayanqanyaq shayämunaq. Pëdrowan Juan, ‘Jesusqa kawarimushqam,’ nishpa nunakunata yachatsiyaptinshi piñashqa këkäyänaq. Tsëshi tsarirkur carcelman llawiratsiyänaq.

Tsë waränimpanash atska mandakoq religiösokunaqa ëllukäriyänaq. Tsëshi tsë kachakätsiyanqan nunatawan, Juanta y Pëdrota apëkayämunaq ëllukashqa këkäyanqanman. Tsëpitanash, ‘¿ima poderwantaq rurayarqonki këta?,’ nishpa tapuyänaq.

‘Jesusta kawaritsimonqan Teyta Diospa poderninwanmi,’ nishpash ninaq Pedro. Tsëshi sacerdötekunaqa ni ima rurëtapis puëdeyantsu kë milagro rasumpëpa kashqa kaptin. Tsënash sacerdötekunaqa, ‘ama yapëqa Jesuspita yachatsikuyankinatsu,’ nishpa alleq willapëkur apostolkunata haqiriyänaq.

Tsë waräninkunapis qeshyaqkunata kachakätsir, y Jesuspita willapäkurllash purikäyänaq apostolkunaqa. Tsë milagrokunapitaqa hinantin Patsachöshi musyariyänaq. Tsëshi, apostolkuna kachakätsiyänampaq Jerusalén lädon markakunapita qeshyëkaqkunata apëkayämunaq. Tsëta chikikurnash apostolkunata tsarïkatsir llawiratsiyänaq tsë religiösokunaqa. ¿Imaraq tsëpitaqa pasarqan?

Këchö rikëkanqëkinöshi, ampipa tsë carcelpa punkunta Teyta Diospa huk angelnin kicharinaq. Tsënash, ‘temploman shëkur nunakunata yachatsiyë,’ nishpa ninaq tsë ángel. Tsë waränin qoyapanash, religiösokuna kachayänaq apostolkunata apayämunampaq, pero manash tariyänaqnatsu. Tsëpitanash templochö taririrnin Sanedrín nishqan wayiman apayänaq apostolkunata.

Tsënash, ‘llapan yachatsikïnikikuwanmi Jerusalenta huntatsishqa kayanki, kananqa mananam Jesuspita parlayankinatsu,’ nishpash mandariyänaq tsë religiösokunaqa. Tsënash, ‘nunakunapitapis masqa Teyta Diostam wiyakunantsik,’ nishpa apostolkuna Jehoväpita yachatsikur yapë qallëkuyänaq. ¡Imanö allim këqa yachakunapaq!