Mushoq Patsachö yamë kawakï
Kë tratädochö këkaq dibüjota rikarnin, ¿ima ninkitaq? ¿Manaku këchönö yamë, kushishqa y imëka hananchö kawëta shonqïki munarin? Mëraq munarinki. Pero ¿imëllapis kënö kawakï chämunqatsuraq?
Pï më nunakunam mana rasumpa kanqanta pensayan. Kanan witsanqa rikantsik guërrakunata, maqanakïkunata, mallaqëkunata, qeshyakunata, tsatsayëta y imëka mana allikunatam. Tsënö kaptimpis, yamë kawakïqa chämunqam. Shamoq tiempopaqmi Biblia kënö nir willakun: “Shuyaquicantsic mushoq sielotam y mushoq patsatam. Tseno cananpaqmi Diosnintsik änimarqantsic. Tse mushoq patsachoqa allicunata rurarllanam, nunacuna cawayanqa” (2 Pedru 3:13; Isaías 65:17).
‘Mushoq sielopaq y mushoq patsapaq’ Biblia parlarqa, manam azulyarëkaq ciëlopaqtsu ni kë kawëkanqantsik Patsapaqtsu parlëkan. Kë kawëkanqantsik Patsa y hanantsik ciëloqa alli rurashqam, mana imëpis ushakänampaq kaqtam Biblia willakun (Salmos 89:36, 37; 104:5). ‘Mushoq patsa’ nirqa, allillata ruraq nunakunapaqmi parlëkan, y pëkunallam kë Patsachö täräyanqa. Y ‘mushoq sielo’ nirnam, kë Patsachö nunakunata mandanampaq kaq Gobiernopaq parlëkan. Pero ¿rasumpatsuraq kë Patsachö alli nunakunallana kawayanqa?
Musyanëkim nunakuna shumaq y kushishqa kawayänampaq Diosnintsik kë Patsata kamanqanta. Pëqa, punta kamanqan nunakunata huk shumaq huertamanmi churarqan, y kënö nirmi mandarqan:“Wambrëkikuna katsun, atskaqyäyë, patsa huntanqanyaq mirayë y dominayë” (Génesis 1:28). Tsënömi karqan, atska wambrayoq kayänanta y hinantin Patsata huk huertaman tikratsiyänantam Jehoväqa munarqan. Pero Adanwan Ëvaqa Diosta wiyakïta manam munayarqantsu, y tsënömi rikätsikuyarqan imëyaqpis kawakïta mana munayanqanta, tsënö kaptimpis, nunakunapaq Diosnintsik munanqanqa manam tsëllachötsu ushakärirqan. ¡Munëninqa rurakärinqa kë Patsata mushoqyäratsimuptinmi! (Isaías 55:11.)
Qampis Padrenuestrota rezakurqa, ciëlochö këkaq Diospa Gobiernon shamunampaq, llapan mana allikunata ushakätsimunampaq y kë Patsata mushoqyäratsimur pëlla mandakamunampaqmi mañakïkanki (Mateo 6:9,10). Tsënö mañakunqëkita Diosnintsik wiyashunëkimanqa markäkunkimanmi o yärakunkimanmi. Palabran Bibliam kënö nin: “Patsachöqa alli nunakunallam täräyanqa, y mana wanushpam tsëchö kawayanqa” (Salmo 37:29).
¿Imanöraq mushoq Patsachö kawakï kanqa?
Diospa Gobiernonqa imëka allikunatam kë Patsachö ruraramunqa, y tsënömi cumplikärinqa kë Patsachö nunakuna shumaq kawakuyänanta Jehová munanqan. Chikinakïkuna, mana alli rikänakïkunapis ushakärinqam, y Patsachö yachaqkuna o täraqkunaqa huknin huknimpis rasumpa amïgom kayanqa. Diosqa Palabranchömi kënö nir awnikun: “Nacionpura mananam peleayanqanatsu, ni wanutsinakïta mananam yachakuyanqanatsu” (Salmo 46:9; Isaías 2:4).
Kë Patsaqa huk shumaq huertamanmi tikrarinqa. Bibliam kënö nin: “Tsaki y mana ima heqanan allpakunam kushikuyanqa, hina tsaki pampakunam paqwë kushishqa kayanqa, y azafrán wëtanöraqmi wëtäyanqapis.[...]Mana ima winanan allpakunapitam yaku pashtamunqa y tsaki pampakunachömi mayunöraq yaku kanqa. Y alläpa achachëwan tsakishqa sitiokunam, shoqushkuna kanan qochaman tikranqa; y paqwë tsaki allpakunapitam yaku ullumunqa” (Isaías 35:1, 6, 7).
Kë Patsa shumaq huertaman tikraramuptinqa, imëka hananchö karmi kushishqa kawakushun. Mananam ni pipis mallaqanqanatsu. “Patsaqa imëkatapis wayïkatsimunqa[m]” ninmi Bibliaqa (Salmos 67:6; 72:16). Llapan nunakunam trabäjonkunawan kushishqa kayanqa, Kamamaqnintsik awnikunqannöpis: “Wayikunatam rurayanqa, y tsëchömi yachayanqa, atska chakrakunatam muruyanqa, y wayunqantam mikuyanqa. Manam[...] huk mikunampaqtsu muruyanqa” (Isaías 65:21, 22).
Kë Patsata Diosnintsik altsaramuptinqa nunakuna manam hatusaq edificiokunachönatsu ni ushakäkïkaq wayikunachönatsu yachayanqa. Dios ninqannöpis: “Wayikunatam rurayanqa, y tsëchömi yachayanqa[...]. Manam huk yachanampaqtsu wayita rurayanqa”. Hinamampis, “imëka rurayanqampis manam envänotsu kanqa” ninmi Bibliaqa (Isaías 65:21-23). Tsënöpam nunakunaqa alli trabäjoyoq karnin kushishqa kawakuyanqa. ¡Alläpa shumaq kawakïmi kanqa!
Tiempo pasariptinqa, unë Edén huertachönö animalkuna manshu kayänampaq y nunakunawampis yamë kawakuyänampaqmi Diospa Gobiernon ruramunqa. Bibliam kënö nin: “Atoqwan achkasmi huk tiempo juntolla puriyanqa, y leopardonam llullu cabrawan junto punuriyanqa, y becërronam leonwan y wira animalwan junto kayanqa; y huk wambrallam tsë llapankunapa pushaqnin kanqa” (Isaías 11:6-9; Oseas 2:18).
Pensari, ¡tsë shumaq Patsachöqa llapan qeshyakuna y nanatsikïkunam ushakärinqa! Diospa Palabranmi kënö nimantsik: “Manam ni pï: ‘Qeshyämi ninqanatsu’” (Isaías 33:24). “Mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacäri[nqam].” (Apocalipsis 21:4.)
¿Imatataq ruranëki tsëchö kanëkipaq?
Alli kaqta ruraqkunalla shumaq Patsachö kawakuyänampaq Diosnintsik awnikunqanta musyariptiki, ¡imaraq shonqïki kushikun! Kë bendicionkuna rurakämunampaq kaqta wakinkuna mana creipaqtanö rikäyaptimpis, Kamamaqnintsikpaqqa kë awnikïkuna ruranan manam ni ichikllapis sasatsu (Salmo 145:16; Miqueas 4:4).
Pero shumaq huertaman tikrashqa Patsachö yachanapaqqa, Diosnintsik mañamanqantsiktaraqmi ruranantsik. Imata ruranantsik más precisanqantaqa Jesus rikätsikurqan Teytanman kënö mañakurmi: “Qamllam Dios canqui. Noqa Jesucristutam que patsaman cachamarqequi. Y ishcantsicta reqimarnintsicmi, nunacuna wiñe caweyoqna cayanqa” (Juan 17:3).
Tsëmi, alli nunakunalla kawayänan Patsachö këta munarqa, Diosnintsik mañamanqantsiktaraq puntata yachakunantsik, y nïkurnam yachakunqantsiknölla kawanantsik, porque “que mundoqa llapan mana alli munenincunawan ushacäreqllam; peru Diospa muneninta ruraq nunaqa wiñepam cawanqa”. Tsëmi tsënö rurarqa, Diosnintsikpita atska bendicionkunata chaskishun (1 Juan 2:17).
Kë tratädochö Escrituras Hebreaspita textokunaqa, Traducción del Nuevo Mundo de las Santas Escrituras (con referencias) nishqampitam. Y Escrituras Griegaspita textokunaqa, Teyta Diospa Mushoq Testamentun Bibliapitam.