¡Demoniukunaqa asesïnum kayan!
Diabluwan demoniukunaqa imëpis mana llakipäkoq y mantsëpaqmi kayashqa. Unë witsanmi Diabluqa, Job nunapa animalninkunata y sirweqninkunata wanutsirqan. Y juntarëkäyanqan wayita “fuerti vientu” ushakätsinanta causarmi, Jobpa chunka tsurinkunata wanutsirqan. Tsëpitanam “chaki puntampita peqa o uma puntanyaq alläpa nanaq qeriwan Jobta qeshyatsirqan” (Job 1:7-19; 2:7).
Jesus Patsachö kanqan witsannam nunakunaman yëkur, müduta, wiskuta o qaprata tikratsiyaq (Mateu 9:32, 33; 12:22). Juk nunanam demoniuyoq karnin, alläpa sufreq y qaranta rumiwan roqukur pureq (Marcus 5:5). Juk jövintanam fuertipa qaparitseq, y patsaman ishkitsirmi ‘pasëpa tapsikacharkoq’ (Lücas 9:42).
Unë witsanqa demoniukunam wakin nunakunata qeshyatsiyarqan y wakintanam pasëpa tapsikachätsiyaq
Kanampis Diabluwan demoniukunaqa unënöllam asesïnu kayan, y ciëlupita qarqamushqa kayanqampitam masraq mana allikunata rurëkäyan. Entëru Patsachö willakuyanqanmi alläpa mana alli kayanqanta rikätsikun. Wakintam qeshyatsiyan, wakintanam paqaspa punutsiyantsu o mantsakëpaqkunata suëñutsiyan, wakintanam violayan, wakintanam löcu o asesïnu tikratsiyan o kikinkunata wanutsikuyman chätsiyan.
Kanan witsanqa demoniukunam wakin nunakunata mana allikunata ruratsiyan y wakintanam mantsëpaqkunata suëñutsir mantsakätsiyan
Surinam nacionpita Lintïna jutiyoq warmim willakun, demoniukuna o mana alli espïritukuna dieciseis familianta wanutsiyanqanta, y kikintapis dieciöchu watapa sufritsiyanqanta y mana tranquïla dejayanqanta. Tsëkunata pasashqa karmi willakun, demoniukunataqa “pitapis wanutsiyanqanyaq sufritsi gustanqanta”.
Peru Diablu imëkata rurëta munaptimpis, Jehoväqa sirweqninkunata cuidëta puëdinmi (Proverbius 18:10).