Jehoväta sirwi, ama Diablutaqa

Llapantsikmi decidinantsik Jehoväta sirwinapaq kaqta o Diablutawan demoniukunata sirwinapaq kaqta. Manam ishkantaqa sirwita puëdintsiktsu. ¡Mas alliqa Jehoväta sirwinqantsikmi!

Jehoväqa alläpa alli Diosmi

Demoniukunaqa nunakunatam sufritsiyan y engañayan, peru Jehoväqa manam tsënötsu. Pëqa papäkuna tsurinkunata kuyayanqannömi llapan nunakunata kuyan. “Llapan alli qarëkuna y imëka allikunaqa” pëpitam shamun (Santiägu 1:17). Pëpaq mana fäcil kaptimpis, alli kaqtaqa manam nunakunata michashqatsu (Efesius 2:4-7).

Diospa tsurin Jesus Patsachö këkar ruranqanta yarpäri. Pëqa müdukunatam parlatsirqan y wiskukunapa o qaprakunapa nawinkunatam alliyätsirqan. Leprawan qeshyëkaqkunata y cöjukunatam alliyätsirqan. Demoniukunatam qarqurqan y imëkawan qeshyëkaqkunatam alliyätsirqan. Teyta Dios poderninwan yanapaptinmi wanushqakunatapis kawaritsirqan (Mateu 9:32-35; 15:30, 31; Lücas 7:11-15).

Ulikur o llullakur engañamänapa rantinmi, Teyta Diosqa imëpis rasumpa kaqllata parlan. Pëqa manam pitapis engañantsu (Nümerus 23:19).

Ama melanëpaq kaqkunata rurëtsu

Aräñapa llikanchö o telaräñanchö chuspi laqarëkar quedakunqannömi, atska millon nunakuna mana alli creenciakunata y engañakur niyanqanta creir tsëkunata dejantsu. Wanushqakunata y demoniukunatam mantsayan. Tsënöllam mana allita rurayänanta o imapis pasakunanta mantsayan. Problëmakunapaq yarpachakurmi brüjukunaman o santukunaman ëwayan. Diospa sirweqninkunaqa manam tsëkunata rurayantsu.

Jehoväqa Diablupitapis mas puëdeqmi. Pëta sirwiptikiqa demoniukunapitam cuidashunki (Santiägu 4:7). Imata rurayäshunqëkipis manam imanäshunkitsu. Maslla musyarinapaq, Nigeria nacionchömi Jehoväpa testïgun markankunapita mana ëwakuyta munaptin, kima brüjukuna brujerïata rurar wanutsita munarqan. Brujerïata rurar mana wanutsita puëdiyaptinmi, juk kaq brüjuqa alläpa mantsakarqan, y tsë Testïguman ëwarmi llakipëkunampaq rogakurqan.

Demoniukuna seguïdu fastidiayäshuptikiqa, Jehoväman jutimpa qayakuy, y pëqa yanapashunkim (Proverbius 18:10). Peru Teyta Dios yanapashunëkipaqqa, espiritismu niyanqanta y demoniukunata adorëtam dejanëki. Ëfesuchö Diosta adoraqkunapis tsënömi rurayarqan. Pëkunaqa magiata rurayänan librunkunata juntëkurmi ninawan ushakätsiyarqan (Hëchus 19:19, 20). Kanampis Teyta Diosta sirweqkunaqa tsëtam rurayänan. Mana allikunapita tsapänampaq katsiyanqanta, “imapitapis cuidanampaq” puritsiyanqan pulsërakunata, santukunata, magiata rurayänan librukunata y espiritismu niyanqampita llapan katsiyanqantam ushakätsiyänan.

Diostam munanqannö adoranëki

Teyta Diosta kushitsita munarqa, manam mana alli religionta ni mana alli rurëkunallatatsu dejanëki, sinöqa Teyta Diostam munanqannö adoranëki. Bibliachömi willakun tsëpaq imata ruranëkipaq kaqta:

Jehoväpa testïgunkunawanmi juntakunëki

Kë Patsachöqa atskaq nunakunam Diabluwan demoniukuna munayanqanta yachatsikuyan y mana allikunata rurayan. Peru Jehoväpapis sirweqninkuna kanmi, pëkunaqa kayan Jehoväpa testïgunkunam (Isaïas 43:10). Entëru Patsachöqa öchu millonpitapis masmi Testïgukuna kayan. Pëkunaqa alli kaqta rurayänampaq y rasumpa kaqta nunakunata yachatsiyänampaqmi kallpachakuyan. Cäsi llapan nacionchömi pëkunataqa Diospita Yachatsikuyänan Wayikunachö tarinki, tsëman chaptikiqa shumaqmi chaskiyäshunki.

Testïgukunaqa Diosta sirwiyänampaqmi nunakunata yanapayan. Pëkunaqa wayikichömi Bibliapita y Jehoväta imanö adoranëkipaq kaqta grätislla yachatsiyäshunki. Testïgukunaqa nunakunata y Jehovä Diosta kuyarmi, rasumpa kaqta kushishqa yachatsikuyan.