Teyta Dios änikunqan Patsa

Tukuyläya nunakunam Shumaq Patsachö juntu mikuykäyan

Diablu mana allikunata ruranqantam Jehoväqa pasëpa ushakätsinqa. Jehoväqa Jesustam Patsata gobernanampaq churashqa. Pë gobernamunqan witsanqa, entëru Patsam shumaq kanqa (Daniel 7:13, 14; Lücas 23:43).

Qateqninchömi willakun Jehovä imakunata änikunqanta.

MËTSIKA MIKUYMI KANQA: “Diosnintsik bendicimashqam, patsachöqa imëka wayunqa”. “Patsachöqa mëtsika gränum kanqa, jirkakuna jananchöpis alläpa atskam kanqa” (Salmus 67:6; 72:16).
MANAM GUËRRAKUNA KANQANATSU: “Jehovä ruranqankunata shamur rikäyë, alläpa espantakuypaqmi. Pëmi patsachö guërrakunata ushakätsin” (Salmus 46:8, 9).
MANAM MANA ALLI NUNAKUNA KANQANATSU: “Diosmi mana alli nunakunataqa ushakätsinqa [...]. Ichikllanam faltan mana alli nunakuna ushakäyänampaq, pëkuna kayanqan kaqman rikachakurpis manam rikankinatsu” (Salmus 37:9, 10).
NUNAKUNAQA MANAM QESHYAYANQANATSU, NANATSIKUYANQANATSU NI WANUYANQANATSU: “Tsë witsanqa wiskukunapis o qaprakunapis rikäyanqam, y sordukunapa rinrinkunapis wiyanqam. Tsë witsanqa, cöjukunapis luychunöran saltakachäyanqa, y müdukunapis kushikurmi büllayanqa” (Isaïas 35:5, 6).

“Kikin Teyta Diosmi pëkunawan këkanqa. Y nawinkunapitam llapan weqita limpianqa, y nunakunaqa manam wanuyanqanatsu o wañuyanqanatsu, llakikuyanqannatsu, waqayanqanatsu ni nanatsikuyanqanatsu. ¡Teyta Diosmi llapan sufritsimanqantsik kaqkunata ushakätsinqa!” (Apocalipsis 21:3, 4).

Jehoväqa manam Diablunö ni demoniukunanötsu engañakun. Pë änikunqanqa llapanmi cumplinqa (Lücas 1:36, 37). Jehoväqa kuyashurnikim Shumaq Patsachö kawanëkita munan. Tsëmi Bibliachö willakunqampita mas yachakunëkipaq, Jehoväpa testïgunkunawan parlanëki. Yachakunqëkiqa engañakur niyanqampita, mana alli creenciakunapita y mana musyar rurayanqampita libri kanëkipaqmi yanapashunki. Tiempuwanqa jutsapita y wanuytapis librim kanki. Tsëpaqmi Jesus kënö nirqan: “Rasumpa kaqtam yachakuyanki, y tsë yachakuyanqëkim esclävunö kayanqëkipita libri kayänëkipaq yanapayäshunki” (Juan 8:32).