Lección 9
Diospa nunankunaqa limpiom kayänan
¿Imanir-raq llapancho limpio kanantsik? (1)
¿Ima ninanraq espiritualmente limpio kë? (2) ¿Kawecho limpio kë? (3) ¿Pensecho limpio kë? (4) ¿Llapan rikakoqcho limpio kë? (5)
¿Imano mana alli parlekunataraq qonqashwan? (6)
1. Jehová Diosqa limpiom, santom. Pëqa shuyaran nunankuna limpio kayänantam, espiritual kaqcho, kawëninkunacho, penseninkunacho, llapan rikakoqninkunachöpis (1 Pedro 1:16). Alleqmi sinchikunantsik Diospa nawimpaq limpio kanapaq. Allapa mana alli ruraqkunapa chöpinchomi tarantsik. Hinamampis kikintsikpa mana alli munënintsikkunawanmi hipantsik. Tseno kekarpis tsarakushwanmi, ama vencimashuntsu.
2. Espiritualmente limpio: Jehovata servita munarnenqa, manam uli religionkunapa yachatsikïninkunaman ni costumbrenkunaman tsaripukushwantsu. Tse ulikoq religionkunapeqqa yarqukurishwanmi, manam imanopa yanapashwantsu (2 Corintios 6:14-18; Revelación 18:4). Razompa kaqta Diospita yachakurïkorqa, cuidakushwannam uli yachatsikoqkuna mana ulipämanantsikpaq (2 Juan 10, 11).
3. Kawëninkunacho limpio: Jehovaqa llapan adoraqninkuna mecho tsecho kekarpis, shumaq razompepa cristianono portakuyänantam munan (1 Pedro 2:12). Pëqa llapan ruranqantsiktam rikarëkamun, pakëllapa ruranqantsiktapis rikarëkamunmi (Hebreos 4:13). Tsemi, manam lluta warmipis ollqupis purikoqkunanotsu, ni mana alli ruraqkunanotsu kashwan (1 Corintios 6:9-11).
4. Penseninkunacho limpio: Peqantsikman alli pensamientokunata churashqaqa, portamientontsikpis alli limpiom kanqa (Filipenses 4:8). Imepis mana allikunata yarpararqa, tseno mana allikunatam rurashun (Mateo 15:18-20). Tsemi llapan pensamientontsik rakchatämoqkunapita witikunantsik. Diospa Palabranta yachakurnenqa, peqantsikta huntatsishun alli limpio pensamientokunawanmi.
5. Llapan rikakoqcho limpio: Cuerpontsikpis ratashnintsikpis limpio cristianopanomi kanan, noqantsikqa Diospa representantinkunam kantsik. Bañoman ewarirnenqa, makintsiktaran paqakunantsik mikunapaqpis, ima mikïta yatanapaqpis. Huk wayicho mana baño kaptenqa tsaki ishpëkunataqa pampashwanmi (Deuteronomio 23:12, 13). Limpio nuna keqa yanapamashun alli saludyoq kanapaqmi. Huk cristianopa wayinqa shumaq limpiom, churapakushqam kanman ruripapis waqtapapis. Cristianokunaqa alli ejemplom kayanman markankunacho nunakuna rikarnin yachakuyänampaq.
6. Limpio parlaki: Diospa nunankunaqa imepis razompa kaqllatam parlayanan. Ulikoqkunaqa manam Diospa Reinonman yekuyanqatsu (Efesios 4:25; Revelación 21:8). Cristianokunaqa manam mana allikunata parlaqtsu kayan. Manam wiyayantsu ni willakuyantsu mana allikunata, ni lluta chistekunatapis. Uryayanqancho, escuelankunacho, markankunachöpis, reqishqam kayan limpio parlakïninkunawan (Efesios 4:29, 31; 5:3).
[18 y 19 kaq päginakunachö fötukuna]
Diospa nunankunaqa llapanchomi limpio kayänan