Yachatsikoq y yanapakoq cancionkuna

BIBLIAPA más jatun libronqa, waranqa wata qellqakanqan cancionkunam kayan. Qellqaqninkunaqa Diosman alläpa yärakuyangantam rikätsikuyaq, jina yarparëta, kushikïta, nanatsikïta, agradecikïta, jutsapita arrepentikïta, alabanzata y llakikïtapis. Llapan qellqaqkunam Diosta kuyayaq y lädonchö kayanqanta rikätsikuyaq. Salmos libropa wakin cancionninkunata rikärishun.

Ciëlochö y Patsachö Autoridad Jehovätam alabanantsik y adoranantsik. Salmo 83:18 textom kënö nin: “Llapan nunakuna musyayänampaq qampa jutikiqa Jehovämi, jinantin patsa janampaqa qamllam Altísimo kanki”. Atska salmokunam Jehoväta alaban ciëlokunata, qoyllurkunata, Patsachö tukï ruranqampita y cuerpontsikta kamanqampitawan (Salmos 8, 19, 139 y 148). Jina sirweqninkunata Jehová imëkapitapis tsapaptin y salvaptinmi alläpa kuyayan (Salmos 18, 97 y 138). Wakinnam alli ruraqkunata yanapaptin y mana alli ruraqkunata castigaptin canticowan alabayan (Salmos 11, 68 y 146).

Jehová kuyaqninkunata yanapan. Wakimpitapis más reqishqa Salmoqa 23 kaq capïtulom, tsëchömi ciëlochö Teytantsikta David igualatsin juk mitsikoq ushankunata shumaq täpanqantawan, pushanqantawan y tsapanqantawan. Salmo 65:2 textochömi yarpätsimantsik Jehová “Mañakïkuna Wiyaq” kanqanta. Jina mana allikunata rurashqa karpis, Salmos 39 y 51 capïtulokunachömi yanapakïta tariyan. Tsëchöqa David rikätsikun jutsampita arrepentikunqanta y Diosnintsik perdonanampaq kaqta musyanqantam. Y Salmo 55:22 textochöqa, Jehoväman markäkunapaq y llakikïnintsikkuna lasaq qepinö kaptimpis pë yanapamänata jaqinapaqmi nimantsik.

Mesïaspa Gobiernonwanmi Jehoväqa mushoq Patsata apamunqa. Salmokunachöqa Mesïaspaq o awnikunqan Reypaq atska kutim parlan. Alli tantearinapaq, Salmo 2 capïtulochömi kë gobernante pëpa contran yarqoqkunata ushakätsinampaq kaqta willakun. Salmo 72 capïtulonam mallaqëta y tukï mana alli rurëkunata ushakätsinampaq kaqta. Y Salmo 46:9 textonam willakun Mesïaspa Gobiernonwan wanutsikïta y llapan armakunata paqwë Dios ushakätsinampaq kaqta. Jina Salmo 37 capïtulochöqa leintsik mushoq Patsachö mana alli nunakuna ushakäyänampaq, y alli nunakunalla yamë y alli kawakuyänampaqmi.

(Salmos libropita jorqashqam.)