¿Ima rurëchötaq anciänukuna congregacionchö yanapakuyan?

Jehoväpa testïgunkunachöqa päguta chaskir-raq yachatsikoqkuna manam kayantsu. Punta cristiänukunapa tiempunchönöllam anciänukunata akrayan ‘Jesusman creyicoqcunata cuidayänampaq’ (Hëchus 20:28). Diospa kaqchö kë poqu cristiänukunam congregacionchö kaqkunata yachatsiyan y cuidayan, tsëmi Biblia pëkunapaq kënö nin: “Pecunata alli boluntaniquicunawan ricayë. Peru ama pipis mandayäshuptiquillaqa, tseno rurayëtsu; sinoqa Diosnintsic munashqanno ganas ganaslla rurayë, qellepaq mana erayashpa [locuyashpa]” (1 Pëdru 5:1-3). ¿Imanötaq yanapayäman?

Cuidayäman y yanapayämanmi. Anciänukunaqa congregacionchö kaqkunatam yachatsiyäman y Diospa kaqchö alli kayänäpaqmi cuidayäman. Tsë carguta Dios qonqanta musyarmi pëkunaqa congregacionchö kaqkunata dominayämantsu, mas bienqa kushishqa y alli kayänäpaqmi yanapayäman (2 Corintios 1:24). Imanömi juk mitsikoq üshankunata cuidar llapanta yupashqata katsin, tsënö kaqllam anciänukunapis congregacionchö kaqkunata llapäta cuidayäman (Proverbius 27:23).

Diospa munëninta rurayänäpaqmi yanapayäman. Llapan semänakunam anciänukunaqa reunionkunachö yachatsikayämun Diospa kaqchö alli kayänäpaq (Hëchus 15:32). Jina pëkunaqa yachatsikoq yarquyänäpaqmi yanapayäman, noqakunawanmi yachatsikoq ëwayan y imanöpis yachatsikuyänäpaqmi tukïnöpa yachatsiyäman.

Cada ünutam yanapayäman. Diospa kaqchö alli kayänäta munarmi anciänukunaqa wayïkunaman watukayäman y Yachatsikuyänan Wayichöpis noqakunawanmi parlayan. Bibliawanmi imëka problëmapa pasayaptï yanapayäman y shoqayäman (Santiägu 5:14, 15).

Jina congregacionchö allipa yanapakurpis kë anciänukunaqa llapannömi trabajayan, familiankunata cuidayan y atiendiyan. Tsëmi kë alli yanapakoq cristiänukunataqa tukïnöpa respetanantsik (1 Tesalonicenses 5:12, 13).

• ¿Congregacionchö anciänukunaqa imakunatataq rurayan?

• ¿Imanötaq cada ünuta yanapayäman?