¿Imanötaq trabajayan Jehoväpa Testïgunkunata Pushaqkuna?

Punta cristiänukunapa tiempunchömi ‘Jerusalenchö apostolcuna y mandacoqcuna’ o anciänukuna Diospa markanta dirigiyaq, pëkunam alläpa precisaq asuntukunata llapan congregacionkunapaq rikäyaq (Hëchus 15:2). Ima asuntuchöpis shumaq acuerduman chäyänampaqqa Bibliatam rikäyaq y Diospa santu espïritun pushanantam jaqiyaq (Hëchus 15:25). Kanan tiempu Jehoväpa Testïgunkunata Pushaqkunapis tsënöllam rurayan.

Pëkunawanmi Diosqa munëninta ruramun. Jehoväpa Testïgunkunata Pushaq cristiänukunaqa Diospa Palabranta alläpam respetayan, Diospa kaqkunata y imëka rurëkunatapis allipam yachayan. Cada semänam juntakäyan entëru Patsachö cristiänukuna necesitäyanqanta rikäyänampaq. Punta cristiänukunapa tiempunchönöllam cartawan, congregacionta watukaqkunawan o juk cristiänukunawan karpis Biblia ninqannö yachatsikuyan. Tsënöpam Diospa markan jukllëllanö pensëyoq kanampaq yanapayan (Hëchus 16:4, 5). Jina mikï cuenta Diospa yachatsikïnintam alistayämun, alli willakï më tsëman chänampaqmi dirigiyämun y cristiänukuna Diospa markanchö carguyoq kayänampaqmi rikäyämun.

Diospa espïritun pushanqannömi rurayan. Jehoväpa Testïgunkunata Pushaqkunaqa, Ciëluchö y Patsachö Autoridäyoq Jehoväpa y congregacionta Dirigeq Jesuspa yanapakïninkunatam ashiyan (1 Corintios 11:3; Efesius 5:23). Kë Pushakoqkunaqa manam Diospa markanchö mandakoqtukuyantsu. Wakin ciëluman ëwaqkunanöllam ‘Cordëru Jesusta maypa aywaptinpis mana dëjar gatiräyan’ (Apocalipsis 14:4, NTCN). Jehoväpa Testïgunkunata Pushaqkunaqa alläpam agradecikuyan pëkunapaq Diosta mañakushqa.

• ¿Pikunataq kayarqan punta cristiänukunata pushaqkunaqa?

• ¿Imanötaq kanan tiempupis Jehoväpa Testïgunkunata Pushaqkunaqa Diospa yanapakïninta ashiyan?