¿Imanir y imanötaq Yachatsikuyänan Wayikunata rurayä?

Diosta adorayänä wayikunatam Yachatsikuyänan Wayi nir reqiyä. Tsënöqa niyä Diospa Gobiernumpita Biblia ninqannö tsëchö yachakurmi y tsëmi Jesuspa precisaq yachatsikïnimpis karqan (Lücas 8:1).

Kë markächö Diosta adorayänä wayim. Tsëpitam alistayämun wayin wayin yachatsikuyänäpaq (Mateu 24:14). Tsë wayikunataqa tukï tamäñuta y cada markapaqnömi rurayan, peru llapampis sencïllullam kayan, wakinchöqa atska congregacionkunam juntakäyan. Pasaq watakunachöqa congregacionkuna miranqanmannömi atska waranqata rurayashqä (cada junaq pitsqatanö). ¿Imanötaq tsëtsikata rurayashqä? (Mateu 19:26.)

Yachatsikuyänan Wayipaq qoyanqanwanmi shäritsiyä. Tsë qellëtam sucursalman apatsiyä y sucursalnam mushoq Yachatsikuyänan Wayita rurayänampaq o altsatsiyänampaq congregacionkunata qellëta qon.

Mana qellëta chaskirlla yanapakoqkunawanmi rurakan. Atska nacionkunachömi Yachatsikuyänan Wayikunata Ruraq Grüpukuna kayan. Tsëkunachö yanapakoq cristiänukunam nacionninkunachö juk congregacionpita juk congregacionman karuta ëwayan tsëchö cristiänu mayinkunata Yachatsikuyänan Wayikunata rurar yanapayänampaq. Wakin nacionkunachöqa alli yachakushqa Testïgukunatam churayan, Yachatsikuyänan Wayikunata sharkatsichö y altsëchö dirigiyänampaq. Y Yachatsikuyänan Wayi rurëchö alli yachaqkunapa yanapakïninta chaskirpis, kikin congregacionpita kaqkunam tsë wayi rurëchöqa mas yanapakuyan. Jehovä santu espïritunwan yanapaptin y markan alli yanapakoq kayaptinmi kë wayikunata rurayashqa (Salmu 127:1; Colosensis 3:23).

• ¿Imanirtaq Diosta adorayänä sitiuta Yachatsikuyänan Wayi nir reqiyä?

• ¿Imanötaq më tsëchö Yachatsikuyänan Wayita rurayä?