¿Imanötaq yanapakushwan Yachatsikuyänan Wayi shumaq kanampaq?

Jehoväpa Testïgunkuna Yachatsikuyänan Wayikunaqa Diospa jutintam apan, tsëmi limpiuta y shumaq altsashqata katsinantsik. Tsëkunata rurarqa Diostam alabëkäshun, tsëmi llapantsik yanapakunantsik.

Reunion ushariptin limpiëchö yanapakushun. Cada reunion ushariptinmi congregacionchö kaqkunaqa llapäkuna pitsapakïchö yanapakuyä, peru semänachö juk kutim chipyëpa limpiapakuyä. Juk anciänu o juk siervu ministerialmi dispunimun shumaq limpiapakuyänäpaq, pitsapakuyänäpaq, trapyayänäpaq, polvuta jorqayänäpaq, sïllakunata acomodayänäpaq, bäñukunata, ventänakunata y espëjukunata limpiayänäpaq, basürata jitayänäpaq, y waqtapapis shumaq pitsayänäpaq. Jina watachömi juk kuti chipyëpa limpiapakuyä. Jinamampis tsë rurëkunaman wamrakunata churëpis yanapanmi Yachatsikuyänan Wayita respetayänampaq (Eclesiastes 5:1).

Altsapakur yanapakushun. Cada watam rikäyämun Yachatsikuyänan Wayi ruripa o waqtapapis imakunachö altsayänan pishinqanta, tsënöpa altsëchö mana alläpa gastayänäpaq (2 Crönicas 24:13; 34:10). Testïgukuna Yachatsikuyänan Wayi limpiu y shumaq altsashqa kaptinqa shumaqmi Diosta adoranapaq. Y llapanchö yanapakurqa rikätsikushun noqantsikpaq alläpa precisanqanta y Jehoväta kuyanqantsiktam (Salmu 122:1). Jina markantsikchö täraqkunapis Jehoväpaq allitam parlayanqa (2 Corintios 6:3).

• ¿Imanirtaq Diosta adorana wayita shumaq limpiuta katsinantsik?

• ¿Imakunatataq rurantsik Yachatsikuyänan Wayi limpiu kanampaq?