¿Imataq Diospa Gobiernon?

1. ¿Imataq Diospa Gobiernon?

Tsë gobiernoqa ciëlochömi këkan y ichikllachönam kanan gobiernokunata ushakäratsir Diospa munëninta ciëlochönölla kë Patsachö ruramunqa. Shuyaranqantsik Diospa Gobiernonqa entero Patsachö täraqkunatam juk kastatanölla tikratsinqa. ¿Këqa manaku alläpa alli willakï?​—Lei Daniel 2:44; Mateo 6:9, 10, y 24:14.

Llapan gobiernokunachöqa juk mandakoqmi kan, tsëmi Jehová Diosqa Tsurin Jesucristuta churashqa Gobiernonchö Mandakoq kanampaq.​—Lei Apocalipsis 11:15.

Rikäri ¿Imataq Diospa Gobiernun? neq videuta

2. ¿Imanirtaq Jesusqa alli mandakoq?

Pëqa alläpa kuyakoq, imëpis alli kaqta ruraqmi (Juan 1:14). Jina yanapamänapaqpis podernin kanmi. Kawariramurqa ciëlotam kutikurqan, y tsëchömi Diospa nöpanchö cargota chaskinqanyaq shuyararqan (Hebreus 10:12, 13). Diosqa Jesusta tsë cargota qoshqanam.​—Lei Daniel 7:13, 14.

3. ¿Jukkunapis Jesuswan gobernayämunqatsuraq?

Awmi, Bibliaqa willakun Diosta sirweq yupashqalla cristiänokuna Jesuswan gobernayämunampaq kaqtam. Daniel 7:27 textom santokuna nin pëkunata. Puntata akrashqa santokunaqa kayarqan Jesuspa apostolninkunam. Y kananyaqpis Jehoväqa akrëkanllam warmitapis ollqutapis santo kayänampaq. Jesusnöllam pëkunaqa espïritunö kawariramur ciëlota ëwakuyan.​—Lei Juan 14:1-3 y 1 Corintios 15:42-44.

¿Ëkaqraq ciëlota ëwayanqa? Bibliaqa nin wallkaqlla kayanqantam, pëkunapaqmi Jesuspis “wallcalla” üshakuna nirqan (Lucas 12:32). Jesuswan gobernaqkunaqa 144.000 nunakuna o runakunam kayan.​—Lei Apocalipsis 14:1.

4. ¿Imataq pasarqan Jesus gobernaq yëkuriptin?

Ciëloman gobernaq yëkurirqa, Satanastawan demonionkunatam puntataqa Patsaman qarqaramurqan 1914 watachö.a Tsëpita witsëpam Diabluqa rabiakur imëka mana allikunata rurar Patsachö qallashqa (Apocalipsis 12:7-10, 12). Tsëpitam waran waran imëka mana allikuna mirakïkan, guërrakuna, qeshyakuna, mallaqëkuna y alläpa Patsa kuyïkuna, tsëkunam rikätsikun Diospa Gobiernon ichikllachöna Patsata gobernamunampaq kaqta.​—Lei Lucas 21:7, 10, 11, 31.

5. ¿Imakunataraq Diospa Gobiernon rurëkämun y ruramunqa?

Entero Patsapa yachatsikurninmi Diospa Gobiernonqa më tsë nacionpita ‘maytsicag runacunata’ juntëkan. Këmi rikätsimantsik alli shonquyoq atska millón ollqukuna y warmikuna Jesuspa mandädonchö kawayänampaq kaqta. Y pëkunaqa Diospa Gobiernon llapan mana allikunata ushakäratsimuptin salvakuyanqam. Tsëmi Diospa Gobiernonchö kawëta munarqa, Jesus ninqanta wiyakunantsik.​—Lei Apocalipsis 7:[9, NTCN], 14, 16, 17.

Tsë waranqa wata Gobiernonchömi, qallananchö Dios munanqanta noqantsikpaq ruramunqa. Entero Patsam juk shumaq huertaman tikranqa. Tsëpitanam Jesusqa Gobiernota Teytanta entreguëkunqa (1 Corintios 15:24-26). ¿Tsë Gobiernopita pillatapis willëta munankimantsuraq?​—Lei Salmo 37:10, 11, 29.