10 kaq yachatsikï
¿Imanöraq reqishwan rasumpa kaq religionta?
1. ¿Jukllëllatsuraq rasumpa kaq religionqa?
‘Cuidacuyë “Profetam cä” nir yachatsicoqcunapita.’ (MATEO 7:15.)
Jesuswan qateqninkunaqa rasumpa kaq religionchömi kayarqan y kawëman apakoq llanu nänitawanmi igualatsirqan y tsëtaqa wallkaqllam tariyampis (Mateo 7:14). Diosqa chaskin Palabran ninqannö adoraqkunatam y tsënö kawaqkunaqa juk pensëyoqllam kayan.—Lei Juan 4:23, 24; 14:6, y Efesios 4:4, 5.
Rikäri ¿Llapan religionkunaku Diospaqqa alli kayan? neq videuta
2. ¿Ima nirqantaq Jesus mana rasumpa kaq cristiänokunapaq?
“‘Dioswanmi quecä’ nirpis rurenincunawanmi musyatsicuyan Dioswan mana cayashqanta.” (TITU 1:16.)
Pëqa willakurqanmi mana rasumpa kaq cristiänokuna yuriyämunampaq kaqta. Pëkunaqa rasumpatanö yachatsikurpis engañakuyanmi. Pero rasumpa kaq cristiänokunaqa Biblia ninqannö kawayanqampitam reqishqa kayan.—Lei Mateo 7:13-23.
3. ¿Imanötaq rasumpa kaq cristiänokunaqa kayan?
Rikärishun pitsqa rurëninkunata:
Biblia Diospa Palabran kanqantam creiyan. Diospa Palabrantam llapanchö wiyakuyan y manam nunakuna o runakuna yachatsikuyanqantatsu (Mateo 15:7-9). Jina yachatsikuyanqannöllam kawayan.—Lei Juan 17:17 y 2 Timoteu 3:16, 17.
Diospa jutintam respetayan. Jesuspis Teytampa jutintam reqitsikurqan. Y pëpitam pï mëta parlaparqan y Teytampa jutin alabashqa kananrëkur mañakuyänampaqmi yachatsikurqan (Mateo 6:9). ¿Mëqan religiontaq täranqëkichö Diospa jutinta reqitsikun?—Lei Juan 17:26 y Romanos 10:13, 14.
Diospa Gobiernompitam yachatsikuyan. Jesusqa shamurqan Diospa Gobiernompita yachatsikunampaqmi, wanunqanyaqmi tsëta yachatsikurqan, y tsë gobiernollam nunakunata salvëta puëden (Lucas 4:43; 8:1; 23:42, 43). Jina qateqninkunapis tsë gobiernopita yachatsikuyänampaq kaqtam nirqan. Diospa Gobiernompita wayikiman yachatsikur chäramuptinqa, ¿mëqan religionpita kanqantaraq pensankiman?—Lei Mateo 24:14.
Manam mundochö kaqkunata rurayantsu. Jesuspa qateqninkunaqa manam polïticaman ni imamampis mëtikuyantsu (Juan 17:16; 18:36). Manam kë mundochö mana allita ruraqkunanötsu portakuyan.—Lei Santiagu 4:4.
Kuyakoqmi kayan. Diospa Palabrampita yachakushqa karmi, tukïläya nunakunata kuyayan. Mana rasumpa kaq religionkunaqa guërrachö yanapakuyanmi, pero rasumpa kaq cristiänokunaqa manam (Miqueas 4:1-3). Sinöqa llapan tiemponkunawan y kayäpunqankunawanmi nuna mayinkunata yanapayan.—Lei Juan 13:34, 35 y 1 Juan 4:20.
4. ¿Reqinkimantsuraq rasumpa kaq religionta?
¿Mëqan religiontaq Bibliapita yachatsikun, Diospa jutinta respetan y Diospa Gobiernonlla nunakunata salvanampaq kaqta willakun? ¿Mëqan religionchötaq rasumpa kuyanakuyan y guërrakunachö yanapakuyantsu? ¿Ima ninkitaq?—Lei 1 Juan 3:10-12.