1 KAQ YACHATSIKÏ
Pakaraq willakïpitam musyëta munantsik
¿Imataq pakaraq willakïqa?. . .a Wallkaq nunakunalla (runakunalla) musyayanqanmi. Bibliaqa willakun juk alläpa precisaq willakïpaqmi y “Diospita shamoq pakaraq willakï” ninmi. Puntallataqa manam ni pï musyarqantsu. Angelkunapis musyëtam munayarqan. ¿Qampis musyëta munankiku?. . .
Angelkunapis tsë pakaraq willakïtaqa musyëta munayarqanmi
Unë tiempuchömi, Diosnintsik juk ollquta y juk warmita rurarqan. ¿Imataq jutinkunaqa karqan?. . . Adan y Ëva. Eden huertachömi täräyarqan. Dios alistashqa kaptinmi, tsë sitiuqa alläpa shumaq karqan. Diosqa munarqan, Adanwan Ëva y tsurinkuna entëru Patsata, Eden huertatanö shumaqta tikratsiyänanta y llapan nunakuna shumaq Patsachö imëyaqpis kawakuyänantam. Peru manam cumplikarqantsu. ¿Imanir?
Adanwan Ëvam Diosta wiyakuyarqantsu, tsënöpam shumaq Patsachöqa tärantsiktsu. Peru Diosqa awnikushqam kë Patsata shumaqman tikratsimunampaq. Tsëchöqa nunakuna kushishqam imëyaqpis täkuyanqa. ¿Imanöraq cumplikanqa? Mëtsika tiempupam musyakëtsu kashqa. ¡Pakaraq willakïmi karqan!
Peru ichikpa ichikpam musyakashqa. Kë Patsaman Jesus shamurmi, Diospa Gobiernunmi tsë pakaraq willakïqa nirqan. Tsëmi Diosman mañakurninqa, “mandacuy Reynoyqui nogacunaman shamutsun” nintsik. Tsënöqa mañakuntsik, tsë mandakïnin kë Patsata alläpa shumaqta tikratsimunan kaptinmi.
¿Tsë shumaq Patsachö kawëta munankiku?. . . Diosta wiyakoqkunallam tsë shumaq Patsachöqa täräyanqa. Bibliaqa willakun, Jehovä Diosta wiyakoq atskaq ollqukunapaq y warmikunapaqmi. Kë follëtuchömi yachakushun pikuna kayanqanta y pëkunapita yachakïta puëdinqantsikta. ¿Pëkunata reqita munankiku?. . .
BIBLIACHÖ LEYIRISHUN:
a Këchö y wakin yachatsikïkunachöpis, cada tapukï ushariptinmi kima (kimsa) puntukunata (...) rikanki. Tsëmi cada tapukïta rurarirnin ichik shuyärinëki wamrëki contestamunampaq.