Samuelqa Jehovä munanqantam rurarqan

Wamra kanqampitam Samuelqa, Diospa carpa wayinchö kawarqan y trabajarqan. Tsëmanmi nunakuna (runakuna) Jehoväta adoraq ëwayaq. ¿Musyëta munankiku Samuel imanir tsëchö kawanqanta? Musyarinapaqqa, maman Änata ima pasanqampita yachakurishun.

Qolloq karmi Änaqa wamrayoq këta munarnin Jehoväta mañakurqan, “Jehovä Diosllä, yanapëkamë” nir. Y “ollqu wamrä kapamaptinqa wayikimanmi apëkushaq tsëchö sirwishunëkipaq” nirmi awnirqan. Tsëmi Jehovä yanapaptin Änapaqa juk wamran yuririrqan y Samuelmi jutin karqan. Kima o chusku watayoq këkaptinnam, awninqanta cumplir Änaqa Diospa carpa wayinman Samuelta apëkurqan tsëchö sirwinampaq.

Diospa carpa wayinchö mandakoq sacerdötiqa Elïmi karqan. Ishkaq poqushqa wamrankunapis tsëchömi trabajayarqan. Tsë carpa wayichöqa Jehovätam adorayaq y tsëmi tsëchö trabajaqkunaqa alli portakuyänan karqan. Peru Elïpa wamrankunaqa mana allikunatam rurayaq, tsëtam Samuel rikarqan. ¿Samuelpis pëkunanötsuraq mana allikunata rurarqan? ¿Imataq ninki?. . . Manam. Samuelqa Jehovä munanqantam rurarqan papäninwan mamänin yachatsiyanqannö.

¿Imatataq Elïqa ruranan karqan? ¿Manaku wamrankunata piñapänan karqan?. . . Awmi. Manam permitinannatsu karqan Diospa carpa wayinchö trabajayänanta. Peru pëqa manam piñaparqantsu. Tsëmi Jehoväqa Elïwan y wamrankunawan piñakurkurqan y castigarqan.

Juk paqas punïkarmi Samuelqa wiyarqan, “¡Samuel!” nir qayayanqanta. Tsëmi Elï kaqta cörripa ëwarqan, y Elïqa, “noqaqa manam qayarqoqtsu” nirqanmi. Y tsënömi ishkë kuti mas pasarqan. Peru kima kaq kutichönam Elïqa Samuelta nirqan: “Yapë qayashuptikiqa: ‘Nimë Jehovä, wiyëkaqmi’ nir contestanki”. Tsënam Samuelqa tsënö contestarqan. Jehovänam nirqan: “Elïta willë, mana allikunata rurayanqampitam familiantawan castigashaq”. ¿Fäciltsuraq Samuelpaq karqan Elïta willanan? ¿Imaninkitaq?. . . Rasumpa kaqchöqa manam fäciltsu karqan, willëtaqa mantsarqanmi. Peru Jehoväta cäsukurmi Elïta willarqan. Dios ninqanqa cumplikarqanmi. Tiempu pasariptinmi Elïwan ishkan wamrankuna wanuyarqan.

Samuelpitaqa yachakïta puëdintsikmi. Mana allita ruraqkunawan juntu këkarpis, pëqa Jehovä munanqantam rurarqan. ¿Tsënötsuraq qampis ruranki? ¿Samuelnötsuraq Jehovä ninqanta imëpis wiyakunki? Tsënö ruraptikiqa Jehovä alläpam kushikunqa. Y papänikiwan mamëkipis kushikuyanqam.