Problëmakunata imanö altsanëkipaq

Jukläya pensayanqanrëkur o imanö wätashqa kayanqanrëkurmi, ollquwan warmi casakuriyaptinqa imëka problëmakuna yurin. Itsachi problëmakunaqa illaqpita yurinman o jukkunapita shamunman.

Itsa mas fäcilqa kanman problëmata cuentaman mana churë, peru Bibliaqa consejakun altsanapaqmi (Mateu 5:23, 24). Bibliapa musyatsikïninkunata wiyakurmi, problëmëkikunata altsëta puëdinki.

1 PROBLËMAPITA PARLË

BIBLIA YACHATSIKUNQAN: “Kanmi tiempu [...] parlanapaq” (Eclesiastes 3:1, 7). Tiemputa raki problëmapita majëkiwan parlanëkipaq, imanö sientikunqëkita willë y imata pensanqanta tapuri. Imëpis rasumpa kaqllata niri (Efesius 4:25). Piñashqa karpis, plëtïmanqa chëtsu. Ima asuntupaq jukläya pensayanqëki plëtïman mana chätsiyäshunëkipaqqa, shumaqlla contestanakuyanqëkim yanapayäshunki (Proverbius 15:4; 26:20).

Majëkiwan mana acuerdu karpis, shumaq tratëtaqa ama jaqitsu, kuyanqëkita y respetanqëkita rikëkätsilla (Colosensis 4:6, NM). Raslla problëmata altsëta procurë, parlapänakïtaqa ama jaqiyëtsu (Efesius 4:26).

ITSA KËNÖ RURANKIMAN:

• Problëmapita parlayänëkipaq imë mas alli kanampaq kaqta rikë

• Majëki parlëkaptinqa parlëta procurëtsu, parlakurinëkipaqpis tiempuqa kanqam

2 WIYË Y ENTIENDITA PROCURË

BIBLIA YACHATSIKUNQAN: ‘Juc castanolla cayanqequirecur respetanacuyë y waquincunatapis mas presisaqpaq churayë’ (Romänus 12:10). Alläpam precisan wiyakïta yachanëki y majëki imata pensanqanta entiendita procuranëki, ‘juc shongolla jucniqui jucniqui consolanacurnin shumag cuyanacur cawacuyanayqui’ y ‘umilde cayanayquipis’ (1 Pëdru 3:8, NTCN; Santiägu 1:19). Imatapis rurëkanqëkita jaqirïkur majëkita wiyëta procurë, o imë höra tsëpita parlayänëkipaq kaqta tapuri. Chikishoqnikitanöqa ama rikëtsu, antis yanapashoqnikitanö rikë, tsëmi yanapashunki ‘raslla mana piñakunëkipaq’ (Eclesiastes 7:9).

ITSA KËNÖ RURANKIMAN:

• Mana gustashuptikipis majëki ninqanta wiyë

• Ima nita munashunqëkita entiendita procurë. Majëki parlanqan imanö wiyakunqanta y qaqllan imanö këkanqanta rikë

3 KALLPACHAKUR SÏGUI

BIBLIA YACHATSIKUNQAN: “Trabajaq nunapaqa pägun kanqam, peru imëpis parlaqlla nunaqa waktsayëmanmi chanqa” (Proverbius 14:23). Problëmata imanö altsëta pensayänëkillatsu manam precisan, sinöqa pensayanqëkinömi rurayänëki. Itsachi kallpachakuyänëkiraq, peru allipaqmi kanqa (Proverbius 10:4). Ishkëki yanapanakurqa bendicishqam kayanki (Eclesiastes 4:9).

ITSA KËNÖ RURANKIMAN:

• Pensari ishkëki imakunata rurarnin problëmëkikunata altsayänëkipaq kaqman

• Tiempu pasanqanmannö rikë imachö mas alliyëkäyanqëkita