Fariseukunata Jesus piñapan

Diospa poderninwan supëkunata Jesus qarqunqanta Ley qellqaqkuna y fariseukuna negarninqa, santu espïritupa contran ofendipa parlëmanmi chëkäyarqan. Tsëmi akrayänan karqan Diosman qaqëta o Satanasman qaqëta. Tsëmi pëkunata Jesus kënö nirqan: “Qamkuna alli planta karqa, allitam wayuyanki, peru mana alli planta karqa, mana allitam wayuyanki, porqui wayïnimpitam plantataqa reqintsik” (Mateu 12:33).

Satanasta sirwirnin Jesus supëkunata qarqurnin alli kaqta rurëkanqanta nirqa, mana rasumpa kaqtam parlëkäyarqan. Jirkapita Yachatsikunqanchöqa clärum rikätsikurqan mana alli plantaqa mana sirweqta wayunqanta. Peru ¿imatataq fariseukunaqa rikätsikïkäyarqan Jesusta mana rasumpa kaqpita tumparqa? Mana alli planta kayanqantam. Tsëmi Jesusqa pëkunata kënö piñaparqan: “Venënuyoq culebrapa wawankuna, ¿imanöraq allikunata parlayanki alläpa mana alli nunakuna këkarqa? Porqui shonquchö imëka këkaqkunapitam shimiqa parlan” (Mateu 7:16, 17; 12:34).

Tsëqa rasunllam, parlanqantsikqa shonquntsikchö ima kanqantam rikätsikun, y parlanqantsikpitam juzgashqa kashun. Awmi, Jesusqa tsëmi kënö nirqan: “Juiciu Junaqchömi cuentata qoyanqa; porqui parlanqëkipitam alli ruraq nunanö rikashqa kanki, y parlanqëkipitam condenashqapis kanki” (Mateu 12:36, 37).

Jesusqa espantëpaq milagrukunatam rurëkarqan. Tsënö kaptimpis Ley qellqaqkuna y fariseukunaqa, “Maestru, juk señaltam qampita rikëta munayä” nirmi juk señalta mañakuyarqan. Jesus ruranqan milagrukunata pushakoq religiösukuna rikashqa o mana rikashqa karpis, tsë milagrukunapaq mëtsika nunakuna parlayanqantaqa musyayaqmi. Tsëmi Jesusqa kënö nirqan: “Kanan witsan alläpa mana alli y Diosta jaqireq nunakunam juk señalta ashirnin sïguiyan, peru manam ni ima señaltapis rikäyanqatsu, sinöqa Diospa willakoqnin Jonasta pasanqan señal-llatam” (Mateu 12:38, 39).

Tsëpitanam, ninqan ima ninan kanqanta kënö entienditsikurqan: “Imanömi Jonaspis jatun pescädupa pachanchö kima junaq y kima paqas karqan, tsënöllam nunapa Tsurimpis patsapa shonqunchö kima junaq y kima paqas kanqa”. Jonastaqa juk jatun pescädum ñoqtakurkurqan, peru tsëpita jitaramuptinqa, imëka kawariramoq cuentam karqan. Tsëmi, tsënö parlarqa wanurirnin kima junaqta kawarimunampaq kaqta Jesusqa nikarqan. Y tiempuwan tsënö pasakuptinqa, pushakoq religiösukunaqa mana kaqpaqmi ‘Jonasta pasanqan señalta’ churayarqan, porqui manam arrepentikïta ni cambiëta munayarqantsu (Mateu 27:63-66; 28:12-15). “Nïnivi nunakunaqa” alläpa jukläyam kayarqan. Pëkunaqa Jonas willakunqanta wiyarmi arrepentikuyarqan. Jina Sëbata gobernaq reina ruranqan pëkunata condenanampaq kaqtam Jesusqa nirqan. Tsë reinaqa Salomonpa yachaq këninta wiyaqmi ëwarqan, y alläpam espantakurqan yachatsikunqankunapita. Peru Jesusqa kikimpaqmi kënö nirqan: “Salomonpitapis mas precisaqmi këchö këkan” (Mateu 12:40-42).

Juk nunapita supë yarqushqa nunatawanmi, tsë ‘witsan mana alli nunakunata’ igualatsirqan (Mateu 12:45). Tsë nuna alli kaq rurëkunaman mana pensaptinmi, pëpita yarqushqa mana alli espïrituqa, kikimpitapis mas mana alli qanchis mana alli espïritukunawan tsë nunaman kutirqan. Tsë cuentallam Israel nacionqa limpiuyätsishqa karqan. Peru tiempuwanqa manam Jehoväpa willakoqninkunata chaskiyarqantsu, y tsëpitaqa manam Jesustapis chaskiyarqantsu. Tsënöpam qallananchö mana alli kayanqampitapis mas mana allimanraq chäyarqan.

Jesus tsënö parlëkaptinmi, mamäninwan wawqinkuna chäriyarqan. Tsënam mas amänunchö këkaqkuna Jesusta kënö willariyarqan: “Mamänikiwan wawqikikunam waqtachö shëkäyan, y rikäyäshïnikitam munayan”. Tsënam, qateqninkunata familiampitapis mas kuyanqanta rikätsikurnin pëkunata rikëkur kënö nirqan: “Mamänï y wawqïkunaqa këchö këkaqkunam kayan, Diospa willakïninta wiyakoqkuna y ruraqkuna” (Lücas 8:20, 21). Tsënömi, qateqnikunata mas kuyanqanta cläru rikätsikurqan. Noqantsiktapis alläpam kushitsimantsik creikoq mayintsikkunawan juknölla kanqantsik, y tsënö imarëkur kanqantsikpita o allita ruranqantsikkunapita mana allita parlayaptinnäqa, juknölla kënintsikqa masran sinchiyan.