Mana alli espïrituyoq jövinta Jesus kachakätsin

Jirkapita uräramurqa, mëtsikaq nunakunatam Jesus, Pëdru, Santiägu y Juanqa taririyarqan. Ley qellqaq nunakunam wakin qateqninkunawan discutikäyarqan. Y Jesusta rikëkurnam qateqninkuna ëqipa chaskeq ëwayarqan. Tsënam Jesusqa kënö tapurqan: “¿Imatataq pëkunawan discutikäyanki?” (Marcus 9:16).

Y tsëchö këkaqkunapitam, juk nuna puntanman qonqurikïkur kënö nirqan: “Maestru, qammanmi tsurïta apamurqö müduyätsikoq mana alli espïritu ullupushqa kaptin. Mëchöpis munanqanchömi patsaman ishkiratsin, tsënam pëqa pushuqata kachun y kirunkunata ruchuchütsin y kallpannaq tikrarin. Qateqnikikunatam rogakurqö qarquriyänampaq, peru manam puëdiyashqatsu” (Marcus 9:17, 18).

Tsë jövinta kachakätsita mana puëdishqa kayaptinmi, Ley qellqaqkunaqa Jesuspa qateqninkunata mana allichö quedatsita munayarqan. Tsëmi Jesusqa, jövinpa teytanta contestanampa rantin, tsëchö këkaqkunata kënö nirqan: “Äh mana markäkoq y llutan ruraq nunakuna, ¿imëyaqraq qamkunawan kashaq markäkïnikikuna kanampaq? ¿Imëyaqraq qamkunata aguantayashqëki?”. Tsënöqa Ley qellqaqkunapaqmi Jesusqa parlëkarqan, porqui jirkachö këkanqanyaqmi pëkunaqa qateqninkunawan discutikäyarqan. Tsëpitanam tsë jövinta pë kaqman apapunampaq teytanta nirqan (Mateu 17:17).

Jesusta rikëkurnam, tsë mana alli espïrituqa jövinta ishkiratsirqan y feyupa tapsikacharkurqan; tsënam patsaman ishkirir qarishpar y pushuqata kachur qallëkurqan. Tsënam Jesusqa tsë jövinpa teytanta kënö tapurqan: “¿Imëpita patsëtaq kënö pasan?”. Tsënam pëqa kënö nirqan: “Wamra kanqampitam, y kutin kutinmi ninaman kar o yakuman karpis wanutsita munarnin jitar ushan”. Tsëpitanam kënö rogakurqan: “Peru imallatapis rurëta puëdirqa, ankupäyämarnï yanapëkayämë” (Marcus 9:21, 22).

Jesuspa qateqninkuna kachakätsita mana puëdishqa kayaptinmi, tsë teytaqa alläpa yarpachakushqa këkarqan. Tsëmi Jesusqa kënö contestarqan: “¿Imanirtaq ‘puëdirqa’ ninki? ¡Markäkoq kaqpaqqa llapampis puëdikanmi!”. Jinan höram tsë jövinpa teytanqa sinchipa kënö nirqan: “¡Markäkïnïqa kanmi! ¡Markäkïnï pishinqanchö yanapëkallämë!” (Marcus 9:23, 24).

Mëtsika nunakuna pëman ëqipa ëwëkaqta rikärirmi, Jesusqa llapan nunakunapa puntanchö tsë supëta kënö piñaparqan: “Müduyätsikoq y sorduyätsikoq mana alli espïritu, noqam mandaq: pëpita yarqï, y amana yapëqa pëman yëkïnatsu”. Peru manaraq yarqurninmi, tsë jövinta qaparïkatsirqan y feyupa tapsikacharkurqan; y jövinqa wanushqanömi quedarirqan. Tsëmi nunakunaqa wanushqa këkanqanta pensayarqan (Marcus 9:25, 26). Peru Jesus makipita pallarkamuptinmi sänuna sharkaramurqan (Mateu 17:18). Tsëta rikarmi nunakunaqa alläpa espantakuyarqan.

Diospita yachatsikoq ëwayänampaq kachanqan witsanqa, qateqninkunaqa supëkunata qarqïta puëdiyarqanmi. Tsëmi juk wayichö japallanllata kënö tapuyarqan: “¿Imanirtaq noqakunaqa qarqïta puëdiyarqötsu?”. Jesusqa markäkïninkuna pishinqanrëkur kanqantam nirqan, jina, “kënö kaq supëqa Diosman mañakushqaran yarqun” nirqanmi (Marcus 9:28, 29). Tsënö alläpa puëdeq supëta qarquyänampaqqa, markäkïta y Diosman mañakïtaraqmi wanayarqan.

Jesusqa kënö nirmi usharirqan: “Sitsun markäkïnikikuna ñushta muru niraqllapis kanman, tsëqa kë jirkata, ‘këpita washaman ëwë’ niyaptikipis, tsëmanmi ëwanqa, y manam ni imapis rurëta mana puëdiyanqëkiqa kanqatsu” (Mateu 17:20). ¡Markäkoq karninqa imëkatam rurëta puëdintsik!

Jehoväta sirwinqantsikchöqa mëtsika problëmakunapa y mana allikunapam pasantsik, y tsëqa imëka jatun jirkanömi kanman. Peru markäkurninqa tsëkunachö allim tsarakushun.