Pascua fiestata celebranampaq ichikllana pishin

Olïvus jirkachömi, Jesusqa këkämunampaq kaqpita y imëkapis imanö këkanqampa ushënimpita chusku apostolninkuna tapukuyanqanta contestarishqa karqan.

Imëkatam 11 de nisan junaqqa rurashqa karqan. Itsa Betaniaman kutikäyanqanchö Jesusqa apostolninkunata kënö nirqan: “Qamkunaqa musyayankim këpita ishkë junaqta Pascua fiesta kanampaq kaqta, y qeruchö wanutsishqa kanampaqmi nunapa Tsurinqa entregashqa kanqa” (Mateu 26:2).

Martis junaqchö pushakoq religiösukunata piñapashqa kaptin y mana allikunata rurëkäyanqanta nunakuna jananchö nishqa kaptinmi, imëkanöpa wanutsita munayarqan. Tsëmi mierculis 12 de nisanqa, apostolninkunawan junaqnimpi tranquïlu karqan y manam nunakuna këkäyanqanman ëwarqantsu. Inti jeqarkuptin Pascua fiestata celebrananta ni imapis michänantaqa manam munarqantsu, tsëqa qallëkurqan 14 de nisanmi.

Peru alläpa precisaq sacerdötikuna y respetashqa nunakunaqa, Pascua fiesta manaraq qallaptinmi wanutsita munar imëkata rurayarqan. Tsëmi Caifas jutiyoq mandakoq kaq sacerdötipa wayinchö ëllukäriyarqan. ¿Imanir? Porqui Jesus condenashqa kaptinmi, alläpa piñashqa këkäyarqan. Tsëmi “Jesusta yachëllapa tsariyänampaq y wanutsiyänampaq” yachatsinakuyarqan. ¿Imanö y imëtaq tsëta rurayänan karqan? Pëkunam, “ama fiestachöqa, nunakuna contrantsik büllar mana shärikurkuyänampaq” niyarqan (Mateu 26:4, 5). Mëtsika nunakuna Jesusman creiyaptinmi mantsayarqan.

Tsëchö këkäyaptinnam, Jesuspa juk apostolnin pëkuna kaqman chärirqan, pëqa Jüdas Iscariötim karqan. Satanasmi shonqunman yëkushqa karqan. Tsëmi Jüdasqa, “¿imatataq qoyämanki makikikunaman entreguëkamunäpaq?” nirqan (Mateu 26:15). Tsënö ninqan allinö kaptinmi, ‘pläta metal qellëta qoyänampaq äniyarqan’ (Lücas 22:5). ¿Ëkatataq qoyänan karqan? 30 pläta metal qellëta qoyänampaqmi äniyarqan, y tsëqa juk sirwipakoqpa chaninmi karqan (Exodu 21:32). Tsëllata äniyanqanwanqa Jesusta alläpa despreciayanqantam pushakoq religiösukunaqa rikätsikuyarqan. Tsënam Jüdasqa ‘mëtsikaq nunakuna mana kayanqan höra makinkunaman rantikïkunampaq alli tiemputa ashir qallëkurqan’ (Lücas 22:6).

Mierculis junaq Inti jeqarkuptinmi, 13 de nisan qallëkoq. Tsë paqasllanam Jesusqa Betaniachö karqan. Qateqnin junaqqa, Pascua fiestata celebrayänampaqmi qateqninkuna alistapakuyarqan. 14 de nisan junaqchömi, juk üshata ashiyänan, wanutsiyänan y entëruta asayänan karqan. ¿Mëchötaq celebrayänan karqan y pikunataq alistapakuyänan karqan? Jesusqa manam tsëtaqa clärutsu willakurqan, tsëchi Jüdasqa alläpa precisaq sacerdötikunata willëta puëdirqantsu.

Itsa juëvis tardi Betaniallachöraq këkar, Jesusqa Pëdrutawan Juanta Jerusalenman kacharqan kënö nir: “Ëwayë y Pascua fiestachö mikunapaq mikïta alistapakuyë”. Pëkunanam kënö niyarqan: “¿Mëchö alistayämunätataq munanki?”. Pënam kënö nirqan: “¡Rikäyë! Markaman yëkurirmi, yakupaq mitupita rurashqa kuntuta apëkaq nunawan topariyanki. Yëkunqan wayiyaq qatir ëwayë. Y kënömi wayiyoqta niyänëki: ‘Maestrum kënö nishunki: “¿Mëchötaq convidashqakunapaq cuartu këkan, qateqnïkunawan Pascua fiesta mikïta mikunäpaq?”’. Y pëmi altuschö këkaq juk jatun y alistashqa cuartuta rikätsiyäshunki. Tsëchö alistayë” (Lücas 22:8-12).

Tsë wayiyoq nunaqa Jesuspa qateqninmi karqan. Tsëchi Pascua fiestata wayinchö celebranampaq Jesus mañanampaq kaqtaqa musyarqan. Ishkan apostolninkuna Jerusalenman chärirqa, Jesus ninqannöllam llapantapis tariyarqan. Tsëmi üsha alli preparashqa kananta y llapampis listu kananta alleq segurakuyarqan, Pascua fiestataqa Jesus y 12 apostolninkunam celebrayänan karqan.