¿Imanirtaq cuerpü shumaq kananta alläpa munä?

¿QAMQA IMATATAQ RURANKIMAN?

Këman pensari: espëjuchö Julia rikäkurqa alläpa wilam rikakun. Tsëmi, “imëkanöpapis uyutänämi” nin. Teytankuna y amïgunkuna uyu këkanqanta niyaptimpis manam creintsu.

Juliaqa ishkë kïlullapapis uyutänampaqmi imëkata ruranampaq pensëkan. Tsëmi mallaqlla këta munëkan . . .

Julianö sientikurqa, ¿imataraq rurankiman?

ALLEQRAQ PENSË

Cuerpïki shumaq rikakunanta munanqëkiqa allillam. Bibliapis Särapaq, Raquelpaq, Josëpaq, Davidpaq y Abigailpaqpis shumaqllan kayanqantam nin. Y Abisagpaqpis selläma shumaq kanqantam nin (1 Rëyes 1:4).

Peru wakin jövinkunaqa cuerpunkuna shumaq rikakunanta munarmi tsëllamanna alläpa yarparäkuyan. Y tsëqa mana allimanmi chäratsinman. Këllaman pensarishun:

• Yachaq nunakunam tapukurnin musyayashqa, pachak jövinkunapitaqa 58 kaq alläpa wila kayanqanta pensayanqanta, peru rasumpëpaqa 17 kaqllam tsë problëmawanqa kayaq.

• Jina ëka kïlu lasäyänampaq kaqpita mas mënus lasaq warmikunata tapuyaptinmi, pachakpitaqa 45 kaq niyarqan alläpa wila këkäyanqanta.

• Wakin jövinkunaqa uyutëta pasëpa munayanqanchömi anorexia qeshyawan qeshyakurkuyashqa. Kë qeshyaqa alläpa peligrösum, porqui manam mikïta munayannatsu.

Kë anorexia qeshyawan o apetïtu asuntuchö juk qeshyakunawan qeshyëkanqëkitana cuentata qokurqa yanapakïta ashï. Teytëkikunata o confiakunqëki mayorna amïguïkikunata willë. Bibliam kënö nin: “Llapan tiempuchömi rasumpa amïguqa kuyakun. Y llakikï tiempuchö yanapamänapaq yurishqam” (Proverbius 17:17).

KËTA RURANQËKIM MAS ALLIQA KANQA

Jananllapa shumaqllan rikakunqantsikpitaqa, shonquntsikchö imanö nuna kanqantsikmi mas shumaqqa rikakun. Rey Davidpa tsurin Absalonpaq Biblia ninqanta rikäri:

“Israelchöqa manam pënö nunaqa karqantsu, alläpa shumaqllan y alabëpaq. Chaki puntampita hasta peqan puntayaqmi alläpa shumaqllan karqan” (2 Samuel 14:25).

Peru alläpa orgullösu, mallaqashqa y traicionëru jövinmi karqan. Tsëmi Bibliaqa pëpaq allitaqa parlantsu, tsëpa rantinqa traicionëru y wanutsikoq kanqantam nin.

Tsëchi Bibliaqa kënö consejamantsik:

“Gamcunaga imayca juc mushog cuerputanö chasquiyashcanqui, [...] Dios Yaya munangannö shumag cawacuyänayquipag[mi]” (Colosensis 3:10, Nuevo Testamento, Conchucos Quechua-Norte).

“Ama yarpacachäyëtsu aqtsequicunata tuquilayaman nactsaqui[llapaq] [...]. Antis shonqiquicunacho yarpacachäyë shumaq alli cawaquipaq” (1 Pëdru 3:3, 4).

Cuerpïki alli rikakunanta munanqëkiqa allillam, peru masqa precisan imanö nuna kanqëkim. Y tiempuwanqa nunakuna masqa rikäyanqa imanö nuna kanqëkitam y manam shumaq cuerpuyoq kanqëkitatsu. Phylicia jutiyoq shipashmi kënö nin: “Shumaqllan kaptikiqa rasllam cäsupäyäshunki, peru alli nuna kanqëkipitam kuyëwanqa yarpäyäshunki”.

ESPËJUCHÖ RIKÄKURI

¿Gustashunkiku imanö rikakunqëki?

¿Imëllapis pensarqunkiku shumaq rikakunëkipaq operakïta o imatapis mana mikïta?

¿Imëki mas shumaq kanantataq munanki? (Señalari).

• TAMÄÑÏKI

• LASANQËKI

• AQTSËKI

• CUERPÏKI

• QAQLLËKI

• QARËKI

Ishkan qallanan tapukïkunachö “awmi” neqta señalashqa karqa y kima kaqchöna kimata o masta señalashqa karqa këman pensë: itsa qamlla mana alli rikakunqëkita nikanki, peru wakinkunaqa allita rikëkäyäshunki. Tsëmi cuentachö katsinëki, imatapis mana allitanö rikëqa fäcil-lla kanqanta (1 Samuel 16:7).