Moisesqa Jehoväta sirwinampaqmi decidirqan

Egiptuchö kawayanqan witsanmi, Jacobpa familiankunataqa israelïtakuna nir reqir qallayarqan. Jacobwan Josë wanuriyaptinqa juk faraonnam gobernar qallëkurqan. Tsëmi tsë faraonqa nirqan, “israelïtakunaqa noqantsikpitapis masnam kayan, y mëtsikaq karmi mantsëpaqna kayan”. Tsëmi esclävunkunaman tikraratsirnin atska ladrïllukunata rurayänampaq obligaq y chakrakunachömi alläpa trabajatseq. Peru tsënö sufrikätsiyaptimpis, israelïtakunaqa mas atskayarmi sïguiyarqan. Tsë mana gustaptinmi faraonqa mandakurqan tsëraq yurishqa israelïta ollqu wamrakunata wanutsiyänampaq, peru warmi wamra yuriptinqa mana wanutsiyänampaqmi nirqan. Tsëta musyar, ¿imanöraq israelïtakuna sientikuyarqan?

Juk israelïta warmipam Jokëbed jutin karqan, pëpam juk shumaq llullun yurirqan. Y pipis mana tarinanta munarmi juk canastaman winarkur Nïlu mayu kuchunchö shoqushkuna rurinman churëkurqan. Y tsë llullupa panin Mirianqa ima pasanqanta musyanampaqmi karullapita rikararqan.

Tsënam faraonpa warmi wamranqa bañakunampaq chärirnin tsë canastata rikärirqan, y waqëkaq llulluta rikëkurmi alläpa llakiparqan. Tsënam Miriamqa kënö nirqan: “¿Munankiku kë wamrata chichirnin cuidapushunëkipaq juk hebrëa warmita ashimunäta?”. “Ëwë ashimuy” niptinnam, tsë wamrapa mamäninllata pusharirqan. Faraonpa wamranqa kënömi Jokëbedta nirqan: “Kë llulluta apakuy y chichirnin cuidëkapamë pagashqëkim”.

Winarkuptinqa Jokëbedqa faraonpa wamrantam tsë wamrata entreguëkurqan, pënam Moises nir jutitsirqan y kikimpa wamrantanömi wätakurqan. Moisesqa gobernaqpa wamran cuentam karqan y imëkanmi kapurqan. Peru Jehovätaqa manam imëpis qonqarqantsu. Moisesqa musyarqanmi israelïta kasta kanqanta, tsëmi Jehoväta sirwinampaq decidirqan.

Tsëpitanam Moisesqa, 40 watayoqna këkar marka mayinkunata rikaq ëwarqan. Y tsëchömi hebreu mayinta juk egipciu nuna maqëkaqta rikarqan, tsënam Moisesqa wanunqanyaq maqëkurnin arënaman pampëkurqan. Tsëta musyarirmi faraonqa Moisesta wanuratsita munarqan, peru pëqa Madian markamanmi qeshpir ëwakurqan. Y tsëchöqa Jehovämi cuidarqan.