Juk ashnum parlarqan

Israelïtakunaqa cäsi 40 watam tsunyaq sitiuchö kayarqan, y puëdeq markakunatam venciyashqa kayarqan. Peru kananqa Jordan mayupa lädunchömi Moab nacionpa juk jatun pampanchö këkäyan. Y ichikllachönam Jehovä Änikunqan markaman chäriyanqa. Tsëmi Moabpa gobernaqnin Balacqa markankunata ushakätsiyänanta mantsar, Balaam jutiyoq nunata israelïtakunata maldicinampaq Moabman qayatsirqan.

Peru Jehoväqa kënömi Balaamta nirqan: “Ama pëkunawan ëwëtsu ni israelïtakunata maldicitsu”. Tsëmi Balaamqa munarqantsu Moabman ëwëta, peru Moabpa gobernaqnin Balacqa yapëmi qayatsirqan, y ëwaptinqa imatapis munanqanta qaranampaqmi änirqan. Peru Balaamqa manam munarqantsu. Tsënam Diosqa kënö nirqan: “Pëkunawan ëwë. Peru noqa ninqaqllatam parlanëki”.

Balaamqa ashnunta montarkurmi Moabpa sur kaq lädumpa ëwarqan. Pëqa Jehovä michashqa këkaptimpis israelïtakunatam maldicita munarqan. Tsëmi Jehoväpa angelnin kima o kimsa kuti nänichö yuripurqan. Balaamqa angelta manam rikarqantsu, peru ashnunqa rikarqanmi. Tsëmi punta kaq kutichöqa nänipita yarqurir juk lädupa ëwakurqan. Juk kaq kutichönam, näni kuchun perqaman laqakar Balaampa chakinta kaniratsirqan. Y ultimutanam, ashnunqa patsaman lätakuykurqan, tsëmi Balaamqa cölerar ashnunta masraq wirurqan.

Tsënam ashnuqa Jehovä parlatsiptin Balaamta kënö nirqan: “¿Imanarqoqtaq kë kiman kuti wirumänëkipaq?”. Balaamnam kënö nirqan: “Upatanömi cäsumarqunkitsu. ¡Espädäta katsirqa mënam wanuratseqman karqan!”. Tsënam ashnunqa kënö nirqan: “¿Manaku noqaqa imëpis shumaq puritserqoq? Mëtsika watakunanam qamta puritseq. ¿Imëllapis kanannö rurarqoqku?”.

Tsënam Jehovä permitiptin Balaamqa angelta rikärirqan, y angelqa kënömi nirqan: “Israelta maldiceq mana ëwanëkipaqtaq Jehoväqa nishurqëki”. Y Balaamnam kënö nirqan: “Mana allitam rurarqö, këllapitachi kutikushaq”. Peru tsë angelqa kënömi nirqan: “Tsë nunakunawan ëwëlla. Peru ëwarnimpis, noqa ninqaqllata parlanki”.

¿Y Balaamqa cäsukurqantsuraq? Manam. Pëqa kima kutim Israelta maldicita tïrarqan. Peru kiman kutichömi Jehoväqa bendicitsirqan. ¿Y imachötaq llapan usharqan? Israelïtakunaqa guërratam Moab nacionwan rurayarqan, y tsëchömi Balaamqa wanurqan. Peru Jehovä ninqanta cäsukushqa karqa, ¿salvakunmanchi karqan aw?