Rahabmi rikapakoq ëwaqkunata pakarqan

Rikapakoq ëwaq israelïtakunaqa Jericö markamanmi chäriyarqan, y Rahab jutiyoq warmipa wayinchömi quedakuyarqan. Tsëta musyarirmi Jericöpa gobernantinqa tsë wayiman soldädunkunata mandarqan. Rahabqa tsë rikapakoqkunata wayimpa altusninman pakëkurmi, tsë soldädukunata nirqan juk sitiuta asheq ëwayänampaq. Nïkurnam Rahabqa tsë rikapakoqkunata kënö nirqan: “Musyämi qamkunataqa Jehovä yanapayäshunqëkita, y kë markakunata entregayäshunëkipaq kaqta, tsëmi qamkunata yanapëkäyaq. Peru familiäta salvayänëkipaq änïkayämë”.

Tsënam rikapakoqkunaqa niyarqan: “Puka waskata ventänëkiman warkuptikiqa, manam ni imapis pasanqatsu wayiki rurinchö këkaqkunata. Tsënömi familiëki salvakunqa”.

Rahabqa wayin waqtampam tsë rikapakoqkunata juk waskawan bajatsirqan Jericöpita ëwakuyänampaq. Y tsë rikapakoqkunaqa jirkakunachö kima junaq karir-ran Josuëman kutiyarqan. Tsëpitaqa Jordan mayuta tsimparirmi israelïtakunaqa Jericö markaman yëkuyänampaq alistakuyarqan. Y tsë markatam puntata ushakätsiyänan karqan. Jehoväqa cada junaq tsë marka waqtampa tumayänampaqmi nirqan, y joqta junaqmi tsënö rurayarqan. Peru qanchis kaq junaqchöqa, qanchis kutim tumayarqan. Nïkurmi sacerdötikuna trompëtakunata tocayarqan, y soldädukunam llapan kallpankunawan qapariyarqan. Tsënam, tsë markapa perqankuna juchurirqan, peru Rahabpa wayinqa tsë markata corralaraq perqachö këkarpis manam juchurqantsu. Rahabwan familianqa Jehovämanmi confiakuyarqan y salvakuyarqanmi.