Gabaonpita nunakunam Josuëwan parlayänampaq ëwayarqan

Jericöchö ima pasakunqantam juk nacionchö nunakuna musyariyarqan. Tsëmi tsë nacionkunapa gobernantinkunaqa israelïtakunawan guërrata rurayänampaq juntakäyarqan. Peru Gabaonpita nunakunaqa juknöpam pensayarqan, tsëmi makwa röpakunata vistikurkur Josuëman chäyarqan, y kënömi niyarqan: “Diosnikikuna Jehoväpa jutimpaq parlayanqanta wiyarmi, alläpa karu markapita shayämurqö. Mëtsëchömi parlayan alläpa puëdeq kar Egiptuchö y Moabchö ruranqanta. Mana ushakätsiyämänëkipaq äniyämaptikiqa, sirweqnikikunam kayäshaq”.

Josuëqa creirirqanmi, tsëmi pëkunawan juk acuerduta rurarqan alli kawakuyänampaq y mana wanutsiyänampaq. Peru acuerduta rurayanqampita kima junaqllatam musyariyarqan, tsë nunakuna vecïnunkunalla kayanqanta y amänunkunallachö kawayanqanta. Tsëmi Josuëqa “¿imanirtaq engañayämarqunki?” nirqan. Tsënam kënö niyarqan: “Wanutsiyämänëkita mantsarmi. Musyayämi qamkunarëkur Diosnikikuna Jehovä pelyanqanta. Ama wanuykatsilläyämëtsu”. Josuëqa änikunqanta cumplirmi pëkunata imanarqantsu.

Tsëpita wallka tiempullatam pitsqa gobernaqkuna y soldädunkuna juntakëkur Gabaonchö nunakunaman guërrata ruraq ëwayarqan. Tsëmi Josuëqa soldädunkunata pusharkur Gabaon nunakunata salvanampaq paqaspa ëwarqan. Y waränin junaqqa patsa waräriptinllam pelyar qallëkuyarqan. Y Canaan nunakunaqa më tsëpa qeshpirmi ëwakuyarqan, peru Jehovämi pëkunapa jananman ruminö jatusaq runtukunata ciëlupita shikwatsimurqan. Y Josuëmi Jehoväta rogakurqan këkanqanllachö Inti o Rupay quedarinampaq. Tsëmi Intiqa këkanqanllachö quedakurqan, y tsënöqa manam ni imëpis pasakushqatsu karqan. Peru, ¿imanirtan Josuëqa tsëta mañakurqan? Jehoväman llapan shonqunwan confiakurmi. Tsëmi Intiqa këkanqanllachö quedarirqan. Tsë junaqqa manam ampirqantsu o tsakarqantsu Canaanpita gobernantikunata y soldädukunata israelïtakuna venciyanqanyaq.