Rutwan Noemï

Unë witsanmi Israel nacionchö mallaqë tiempu karqan, tsëmi Noemï jutiyoq warmi, qowanwan o runanwan y ishkë wamrankunawan Moab nacionman ëwakuyarqan. Tsëchömi Rut y Orpä jutiyoq shipashkunawan wamrankuna casakuyarqan, y tiempu pasariptinmi Noemïpa qowan wanukurqan. Tsëpitanam ishkan wamrankunapis wanukuyarqan.

Tsëpitanam Noemïqa musyarirqan Israel nacionchö mallaqë pasarishqana kanqanta, tsëmi markanta kutikurqan. Y lumtsuyninkunapis pëwanmi ëwakuyarqan. Peru ëwëkäyaptinmi Noemïqa ishkanta kënö nirqan: “Qamkunaqa alli warmi y alli lumtsuymi kayarqunki, allichi yapë casakuykuyankiman. Moabchö wayikikunata kutikuyë”. Tsënam Rutwan Orpäqa kënö niyarqan: “Alläpam kuyayaq, manam dejayashqëkitsu”. Peru Noemïqa yapëmi nirqan “kutikuyë wamralläkuna”. Tsënam Orpäqa kutikurqan, peru Rutqa quedakurqanmi. Tsëmi Noemïqa Rut-ta kënö nirqan: “Rikë, Orpäqa markanman y santunkuna adoraqmi kutikan. Qampis pëwan kutikuy”. Peru Rutqa kënömi nirqan: “Manam dejashqëkitsu. Markëkim markä kanqa, y Diosnikim Diosnï kanqa”. Tsënö neqta wiyar, ¿imanöraq Noemï sientikurqan?

Rutwan Noemïqa cebädata cosechayänan witsanmi Israelman chäriyarqan. Juk kutim Rut ëwarqan Rahabpa wamran Boazpa chakranman pallapakoq. Rutpaqqa Moabpita kanqanta y suegran Noemïta alläpa kuyarnin pëwan quedakushqa kanqantam Boazqa wiyashqa karqan. Tsëmi peonninkunata nirqan segayanqan espïgakunata wakin wakinta Rutpaq dejayänampaq.

Tsë ampim o paqasmi Noemïqa Rut-ta kënö tapurqan: “¿Mëchötan kanan junaq pallapakurqunki?”. Tsënam Rutqa, “Boazpa chakranchömi” nirqan. Y Noemïqa kënömi nirqan: “Boazqa wanukushqa qowäpa kastanmi. Tsë chakrallachö wakin shipashkunawan pallapakur sïgui. Tsëchöqa allim kakunki”.

Rutqa cosëcha ushanqanyaqmi Boazpa chakranchö pallapakurqan, y Boazqa rikarqan alli y trabajadöra warmi kanqantam. Tsë witsankunaqa, juk nuna, wamran manaraq kaptin wanukuptinqa, juk kastanmi tsë wanukushqapa warmiwan casakuyta puëdeq. Tsëmi Boazqa Rutwan casakurqan. Y wamrankuna yuririptinmi Obed nir jutitsiyarqan. Tiempuwanqa Obedpa kastampitam gobernaq David yurirqan. Noemïpa vecïnankunaqa alläpa kushikurmi kënö niyarqan: “Puntataqa alläpa kuyashoqniki Rutwanmi Jehovä bendicishurqunki. Y kananqa willkayoqnam kanki. Tsë llapampita Jehoväta alabashun”.