Gedeonmi Madian nunakunata vencirqan

Tiempu pasariptinqa, yapëmi israelïtakunaqa Jehoväta dejarir mana väleq santukunata adorar qallëkuyarqan. Y Madian nunakunam siëti watapa animalninkunata suwapar y cosëchankunata perditsir kayarqan. Pëkunata mantsarmi israelïtakunaqa machëkunachö y jirkakunachö y fäcil-lla mana chänan sitiukunachö kawayarqan. Tsëmi imanö këta mana puëdir salvëkunampaq Jehoväta rogakuyarqan. Jehoväqa juk angeltam mandarqan Gedeon jutiyoq jövinta kënö ninampaq: “Qamtam Jehovä akrashurqunki pelyëta yachaq valienti nuna kanëkipaq”. Gedeonnam kënö nirqan: “Teyta Jehovä noqallaqa mana kaqllam kallä, ¿imanötan Israelta salvëta puëdishaq?”.

Gedeonqa pëta Jehovä akrashqa kanqantam alli musyëta munarqan. ¿Y imatataq rurarqan? Juk vellon millwata patsaman churarirmi Jehoväta kënö nirqan: “Kë vellon millwata shullya oquptin y patsa tsakilla kaptinqa, änikunqëkinö Israelta salvanäpaq kaqtam musyashaq”. Waräninqa, millwaqa oqum warämurqan, peru patsaqa tsakim këkarqan. Tsënam Gedeonqa Jehoväta yapë nirqan waränimpaq millwa tsaki waränampaq, peru patsaqa oqushqa kanampaq, y Gedeon ninqanmi yapë pasakurqan. Tsënömi Gedeonqa alli musyarirqan pëta Jehovä akrashqa kanqanta. Tsëmi Madian nunakunawan pelyaq ëwanampaq soldädunkunata juntarqan.

Jehoväqa kënömi Gedeonta nirqan: “Israelïtakunatam yanapashaq chikeqninkunata venciyänampaq, peru mëtsika soldädukunayoqmi kanki, yanapaptïqa kikïkunapa kallpäkunawanmi venciyarqö nirmi alabakuyanqa. Tsëmi ëwëta mantsaqkunataqa kutikuyänampaq ninëki”. Tsënam 22.000 soldädukuna wayinkunaman kutikuyarqan, y 10.000 soldädukunallam quedayarqan. Peru Jehoväqa kënömi nirqan: “Mëtsika soldädukunaran kan. Juk mayuman pushëkur yakuta upuyänampaq nï, y chikiyäshoqnikikunata rikachakur rikachakur upoq kaqkunallata quedatsi”. Pushariptinqa 300 soldädukunallam tsënö upuyarqan, tsëmi Jehoväqa nirqan pëkunallawan Madianpita 135.000 soldädukunata ushakätsinampaq kaqta.

Tsë paqasmi Jehoväqa Gedeonta kënö nirqan: “Jinan höra ëwayë Madian nunakunawan pelyayänëkipaq”. Tsënam Gedeonqa waqrapita rurashqa trompëtankunata y rawrëkaq o lunyëkaq antorchankunata y allpa mankakunata soldädunkunata entregarqan, y kënömi nirqan: “Rikäyämanki y noqa ruranqänölla rurayanki”. Nïkurmi waqrapita rurashqa trompëtata tocarqan y këkätsinqan allpa mankata pakir usharqan y rawrëkaq antorchatam wakman këman kuyutsirqan, y kënömi nirqan: “¡Jehovä Diospa y Gedeonpa espädan!”. Tsënam 300 soldädunkunapis tsënölla rurayarqan. Tsëta rikëkurmi Madian nunakunaqa alläpa mantsakäyarqan, y juiciunnaqmi wakpa këpa qeshpir ëwayarqan. Y pantarmi kikinkunapura wanutsinakuyarqan, tsënömi Jehoväqa israelïtakunata yapë yanaparqan chikeqninkunata venciyänampaq.