Davidwan Goliat

Jehovämi Samuelta kënö nirqan: “Belen markachö Jesë kaqta ëwë. Jesëpa juk tsurintam gobernanti kanampaq akrarqö”. Tsënam Samuelqa ëwarqan, y Jesëpa mayor tsurinta rikärirmi shonqunllachö kënö nirqan: “Jehoväqa pëtachi gobernanti kanampaq churanqa”. Peru Jehoväqa, “manam pëtatsu akrarqö” nirqanmi. Y kënöpis nirqanmi: “Nunaqa nawin rikanqanllatam rikan, peru noqaqa shonqun imanö kanqantam rikä”.

Tsënam Jesëqa seis mas tsurinkunata Samuelta reqitsirqan. Peru Samuelqa kënömi nirqan: “Jehovä Diosqa manam mëqantapis akrashqatsu gobernanti kanampaq. ¿Pëkunallaku llapan tsurikikuna kayan?”. Jesënam kënö nirqan: “Ultimu kaqllanam faltan. Davidmi jutin, pëqa üshakunata mitsikurmi këkan”. Y David chäriptinmi Jehoväqa Samuelta kënö nirqan: “¡Pëmi! ¡Pëtam akrarqö!”. Tsënam Samuelqa Davidpa peqanman o umanman aceitita jicharqan. Tsënömi Israelpa gobernantin kanampaq akrarirqan.

Juk tiempu pasariptinmi filisteu nunakunawan israelïtakuna guërrata rurayarqan. Y filisteu nunakunapaqa juk jatun soldädunkunam karqan, Goliatmi jutin karqan y allim pelyëta yachaq. Tsëmi israelïtakunapita burlakur cada junaq fuertipa kënö neq: “Mä alli pelyëta yachaq soldäduta akrayämuy. Pë vencimaptinqa, llapäkunam qamkunata sirwiyashqëki. Peru noqa venciptïqa, qamkunam sirwimaqnïkuna kayanki”.

Davidpa wawqinkunapis soldädum kayarqan, tsëmi Davidqa pëkunapaq mikuyninkuna aparqan. Y Goliat burlakoqta wiyarirmi Davidqa nirqan: “Noqam pëwan pelyanäpaq ëwashaq”. Tsënam Saulqa nirqan: “Qamqa jövinllaran kanki”. Peru Davidqa, “Jehovämi yanapamanqa” nirqanmi.

Tsënam Saulqa armadüranta vistitsirqan. Peru Davidqa kënömi nirqan: “Mana yachakashqa karmi, këkunawanqa purita puëdïtsu”. Tsëmi warakanllawan ëwarqan, y yaku ëwananman urärirmi pitsqa redondu rumikunata wallqaranqan bolsanman winarqan. Tsëpitanam warakanta alistarkur Goliatman ëwarqan. Tsëmi Goliatqa kënö nirqan: “Musyanëkipaq mä shamuy. Wanuskatsirnikim wiskurkuna y chukaru animalkuna mikuyäshunëkipaq jitarishqëki”. Peru Davidqa manam mantsarqantsu, y kënömi nirqan: “Qamqa noqawan pelyaq shamuykanki juk espadëkiwan y juk lancëkiwanmi. Peru noqaqa qamman shamuykä Jehovä Diospa jutinchömi. Qamqa manam noqakunawantsu pelyëkanki, sinöqa Dioswanmi. Këchö llapan këkaqkunam musyayanqa, salvayämänampaq espädata ni lanzata Jehovä Dios mana wananqanta. Pëmi llapëkita venciyänaqpaq yanapayämanqa”.

Tsënö nirirmi Davidqa warakanman rumita churarkur llapan kallpanwan warakëkurqan. Davidta Jehovä yanapaptinmi tsë rumiqa imëka bälanö ëwarqan y Goliatpa urkunman yëkurirqan. Tsënömi tsë jatun nunaqa wanurirqan. Tsënam filisteu nunakunaqa israelïtakuna wanutsiyänanta mantsar ëwakuyarqan. Y qamqa, ¿Davidnöku Jehoväman confiakunki?