Jehoväpa templun

Israel nacionta gobernar qallanqan witsanmi, Jehoväqa Salomonta kënö tapurqan: “¿Imanö yanapanatataq munanki?”. Tsëmi Salomonqa kënö nirqan: “Jövinllaraq karmi imanö gobernëtapis yachätsu. Markëkita shumaq cuidanäpaq alli yachaqta tikrëkatsillämë”. Tsëmi Jehoväqa kënö nirqan: “Yachaq këta mañamashqa kaptikim, pï mëpitapis mas yachaqta tikratsishqëki. Y yanapashqëkim rïcu kanëkipaq, reqishqa kanëkipaq y atska watakuna kawanëkipaq”.

Salomonqa templuta ruratsirmi qallëkurqan. Öruwan, pläta metalwan y shumaq rumikunawanmi ruratsirqan. Awmi mas alli kaq materialkunatam utilizäyarqan, y imëka rurëta yachaq mëtsika ollqukuna y warmikunam trabajar yanapakuyarqan. Y siëti watallachömi ushariyarqan. Y Jehoväta entregayänan junaqmi qarëkunata altarchö rupatsiyänampaq churayarqan. Tsëpitanam altar puntanman qonqurikuykur Salomon kënö mañakurqan: “Jehovällä, qamqa këpitapis mas jatun y mas shumaq templuyoq këtam merecinki. Peru adorayanqäta y mañakayamunqäta wiyëkullë”. ¿Y ima nirqantan Jehoväqa? ¿Gustumpaqnöku templu karqan? ¿Chaskirqanku Salomon mañakunqanta? Salomon mañakur ushariptinllam ciëlupita nina shamur, altarman churayanqan qarëkunata usharirqan. Tsënömi Jehoväqa rikätsikurqan gustumpaqnö templu kanqanta. Y tsëta rikarmi israelïtakunaqa alläpa kushikuyarqan.

Alläpa yachaq kaptinmi gobernanti Salomontaqa entëru Israelchö y karu markakunachöpis pï më reqiyaq. Problëmankunata altsëta yanapanampaqmi më tsëpita nunakuna ashiyaq. Sëbata gobernaq reinapis sasa o aja tapukuykunawan probëta munarmi watukaq ëwarqan. Y Salomonta wiyarirmi kënö nirqan: “Qampaq niyämanqantaqa manam creirqätsu, peru kananmi musyarï willayämanqampitapis mas yachaq y mas kapoqyoq kanqëkita. Diosniki Jehoväqa alläpam bendicishurqunki”. Israel nacionchöqa shumaq y kushishqam nunakuna kawakuyaq. Peru ichikllachönam llapan cambiarinan karqan.