Israel nacionqa ishkëmanmi rakikarqan

Jehoväta Salomon adoranqan witsanqa shumaqmi Israel nacionchö kawakuyarqan. Peru Salomonqa santukunata adoraq juk nacion warmikunawanmi casakurqan. Y ichikllapa ichikllapam jutsa rurëman charqan y santukunata adorarmi qallëkurqan. Tsëmi Israelpa Diosnin Jehoväqa pëwan cölerakur kënö nirqan: “Israel nacionta manam familiëkinatsu gobernanqa, ishkë nacionmanmi Israelta rakirishaq. Juk sirwishoqnikitam churashaq mas jatun kaq nacionta gobernanampaq, y familiëkiqa taksha kaq nacionllatanam gobernanqa”.

Tsënö ninqanta entiendiyänampaqmi Jehoväqa kënö pasakunanta permitirqan: Salomonpa Jeroboan jutiyoq sirweqninmi Jerusalen markapita yarqushqa karqan, y nänichömi Diospa willakoqnin Ahïyawan tinkuyarqan. Ahïyaqa aqshunanta döci pedäzuman rachirirmi Jeroboanta kënö nirqan: “Kë chunka pedäzum qampaq kanqa. Jehovämi kënö nishunki: ‘Salomonqa mananam llapan kastakunapa mandaqninnatsu kanqa, qamnam chunka kastakunapa gobernaqnin kanki’”. Tsëta musyëkurmi Salomonqa Jeroboanta wanutsita munarqan. Tsëmi Jeroboanqa Egiptu nacionman qeshpir ëwakurqan. Salomon wanuriptinqa tsurin Rehoboamnam gobernarqan. Y Jeroboanqa peligru pasarishqana kanqanta musyarirmi Israel nacionta kutikurqan.

Israelchö dirigentikunam Rehoboamta kënö niyarqan: “Tsë nunakuna niyäshunqëkita ruraptiki y shumaq parlapaptikiqa imëpis sirwiyäshunkim”. Peru pëwan winashqa yanapaqnin jövinkunaqa kënömi niyarqan: “Pëkunataqa masraqmi exiginëki. Y masmi trabajatsinëki”. Tsënam pëkunata cäsur nunakunata mana allipa tratarqan. Tsëmi nunakunaqa contran churakäyarqan, y Jeroboantam churayarqan chunka kastakunapa gobernaqninkuna kanampaq. Tsë chunka kastakunatam Israel niyaq, y ishkë kaq kastakunatanam Judä niyaq; pëkunallam Rehoboamta dejayarqantsu. Tsënömi Israelchö döci kastakuna rakikäriyarqan.

Jerusalenqa Rehoboam gobernanqan nacionpa mas reqishqa markanmi karqan. Tsëmi Jeroboanqa munarqantsu nacionnimpita kaqkuna Jehoväta adoraq Jerusalenman ëwayänanta. Jeroboanqa pëta cäsuyänampa rantin Rehoboam ninqanta rurar qallëkuyänantam mantsarqan. Tsëmi örupita ishkë mallwa törukunata ruratsirqan y kënömi nirqan: “Jerusalenman ëwayänëkiqa alläpa karum. Mejorqa këllachöna kë mallwa törukunata adorayë”. Tsëmi Jeroboan ninqankunata cäsukur Jehoväta adorëta yapë dejariyarqan.